Haweenay Markii Ugu Horaysay Garsoore Ka Noqotay Tartan Kubbada Cagta Ee Horyaalada Yurub

Haweeney ka mid ah booliska Jarmalka ayaa noqotay qofkii dumar ah ee ugu horeesay ee garsoore ka noqota ciyaar ay dheelayaan rag oo ka tirsan horyaal ka mid ah kuwa ugu weyn kubadda cagta Yurub.

Bibiana Steinhaus, oo 38 jir ah ayaa seeriga u haysay kulan ay yeesheen kooxaha Hertha Berlin iyo Werder Bremen oo ka tirsan horyaalka Jarmalka ee Bundesliga.

Waa haweeneydii ugu horaysay ee garsoore ka noqota ciyaar ay rag dheelayaan oo ka tirsan horyaallada dalalka caanka ku ah kubadda cagta ee Yurub, sida Jarmalka, Ingiriiska, Faranisiiska, Talyaaniga iyo Spain.

Bibiana Steinhaus ayaa khibrad ballaaran u leh garsoorenimada kubadda cagta, waxaana ay qabatay fiinaalkii horyaallada gabdhaha ee sanadkan, iyo weliba kulamo ka tirsan horyaalka labaad ee kooxaha ragga ee Jarmalka.

Waxa ay sheegtay in aanay waxba kaga duwaneyn garsoorayaasha ragga ah.
Ciyaarta ay garsooraha ka noqotaya ayaa ku idlaatay barbaro 1-1 ah, wax khilaaf ahna kama dhicin.

Aragtidaada Ka Dhiibo

Faalo