HNN: Madaxweynihii hore ee Maraykanka, Donald Trump, ayaa sheegay in Maraykanku uusan wax lug ah ku lahayn weerarro ay Israa’iil ku qaadday goob gaas oo muhiim ah oo ku taalla dalka Iran. Hadalladan ayaa imanaya xilli ay sii kordhayaan xiisadaha gobolka Bariga Dhexe, kuwaas oo sare u qaaday walaaca laga qabo in colaadda ay sii fido.
Maraykanka oo ah xulafada ugu dhow ee Israa’iil, ayaa wajahaya cadaadis ku aaddan inuu caddeeyo heerka uu uga warqabay weerarkan. Qaar ka mid ah siyaasiyiinta iyo khubarada amniga ayaa is weydiinaya in Washington ay si qarsoodi ah uga ogaatay qorshaha, ama ugu yaraan ay heleen digniino hore oo ku saabsan suuragalnimada weerar noocan oo kale ah. Haddii ay taasi jirto, waxay keeni kartaa dood ku saabsan doorka Maraykanka ee sii hurinta ama xakameynta xiisadaha gobolka, iyadda oo Isra’iil ay sheegtay in weerarkan ay wada fuliyeen Maraykanka iyo Israa’ii, taas oo keentay su’aal culus oo ah.
Trump ayaa si cad u sheegay in Maraykanku uusan ku lug lahayn weerarradaas, isagoo isku dayaya inuu meesha ka saaro tuhun kasta oo ah in Washington ay taageertay ama ka qayb qaadatay. Wuxuu carrabka ku adkeeyay in siyaasadda Maraykanku ay tahay in laga fogaado isku dhacyo cusub oo ka dhaca gobolka, inkastoo xiriirka dhow ee u dhexeeya Maraykanka iyo Israa’iil uu weli jiro.
Hadalladan ayaa sidoo kale loo fasiran karaa isku day uu Trump ku doonayo inuu ka ilaaliyo Maraykanka in lagu eedeeyo sii hurinta xiisadaha, gaar ahaan iyadoo xaaladda gobolka ay horeyba u ahayd mid kacsan. Weerar kasta oo lagu qaado kaabayaasha tamarta ee Iran wuxuu halis gelin karaa xasilloonida gobolka iyo sidoo kale suuqyada tamarta ee caalamka.
Hadallada Trump waxay muujinayaan dadaal lagu doonayo in lagu kala fogeeyo Maraykanka iyo dhacdooyinka militariga ee ka socda gobolka, balse xaaladda guud ayaa weli ah mid xasaasi ah. Mustaqbalka dhow ayaa muujin doona in xiisadahan ay sii xoogeysan doonaan iyo in kale, iyo sida ay u saameyn doonaan siyaasadda iyo dhaqaalaha caalamiga ah.
Heemaal News Network.