Warbixin ay daabacday Reuters ayaa muujinaysa in qiimeyn uu sameeyay sirdoonka Maraykanka ay caddeyneyso in hoggaanka Iran uu weli si adag u taagan yahay, islamarkaana aanu muuqan khatar degdeg ah oo horseedi karta burbur nidaamka. Tani waxay imanaysaa inkastoo ku dhowaad laba toddobaad oo duqaymo culus ay fuliyeen Maraykanka iyo Israel.
Ilo sirdoon oo dhowr ah ayaa bixiyay falanqeyn joogto ah oo tilmaamaysa in nidaamka talada haya uusan ku jirin xaalad jilicsan, isla markaana uu weli si buuxda u maamulayo gudaha dalka iyo shacabka. Mid ka mid ah ilahaas ayaa xusay in warbixinnadii ugu dambeeyay la diyaariyay maalmo gudahood, taas oo muujinaysa in xaaladda si dhow loola socdo.
Dhanka kale, cadaadis siyaasadeed oo sii kordhaya, gaar ahaan kororka qiimaha saliidda, ayaa wajahaya madaxweynaha Donald Trump. Wuxuu soo jeediyay in uu “dhowaan” soo afjari doono hawlgalkan militari ee ballaaran, kaas oo noqday kii ugu weynaa ee United States qaaddo tan iyo 2003.
Si kastaba ha ahaatee, warbixinnadu waxay tilmaamayaan in helitaanka xal lagu soo afjaro dagaalka ay adkaan karto, maadaama hoggaanka adag ee Iran uu weli si xooggan ugu dheggan yahay awoodda.
Qiimeynta sirdoonka ayaa sidoo kale muujisay in hoggaanka culimada dalkaasi ay muujiyeen isku duubni, xitaa ka dib dilkii Hoggaamiyihii Sare Ali Khamenei 28-kii Febraayo, oo ku beegneyd bilowgii duqaymaha.
Dhinaca kale, mas’uuliyiin ka tirsan Israel ayaa si hoose u qiray in aanay jirin dammaanad muujinaysa in dagaalku horseedi doono burburka dowladda Iran. Waxay sidoo kale xuseen in xaaladda gudaha dalkaasi ay tahay mid si joogto ah isu beddeleysa, islamarkaana ay suurtagal tahay in isbeddello lama filaan ah ay ka dhacaan.