Hoggaamiyaha laga tirada badan yahay ee Aqalka Sare, Chuck Schumer, ayaa Arbacadii dhaliilay Donald Trump, isaga oo ku tilmaamay khudbaddii ugu dambeysay ee madaxweynaha uu ka jeediyay Kongareeska mid ka tarjumaysa “xaalad mala-awaal ah.”
“Xalay ma ahayn Khudbaddii Xaaladda Midowga ee Maraykanka, waxay ahayd xaaladda mala-awaalka ee Donald Trump. Muddo laba saacadood ku dhow, madaxweynuhu wuxuu istaagay qolka Aqalka Wakiillada isaga oo is hambalyeynaya, isla markaana buunbuuninaya naftiisa, balse aan soo bandhigin wax xal ah oo ku aaddan dhibaatooyinka badan ee dalkeenna. Wuxuu ku nool yahay goobo ka go’an xaqiiqda,” ayuu Schumer ka sheegay fadhiga Aqalka Sare.
Hadalladiisa ayaa yimid maalin kadib markii Trump uu jeediyay khudbaddii ugu dheereyd ee uu ka hor jeediyo Kongareeska tan iyo markii uu xilka qabtay — taas oo qaadatay qiyaastii saacad iyo 47 daqiiqo — isaga oo ku dhawaaqay in Maraykanku “mar kale guuleysanayo,” isla markaana iftiimiyay waxa uu ku tilmaamay guulaha waaweyn ee maamulkiisa.
Dimuqraaddigan ka soo jeeda New York ayaa sheegay inuusan “waligiis maqal khudbad Xaaladda Midowga ah — anigoo dhowr maqlay — oo farqiga u dhexeeya hadalka madaxweynaha iyo xaqiiqda dalka uu sidaas u weyn yahay.”
“Taa beddelkeeda, Donald Trump wuxuu inta badan khudbaddiisa ku bixiyay ka hadalka guulo, balse aan ahayn kuwa maamulkiisa, ee ah guulaha muwaadiniin kale oo Maraykan ah oo uusan wax shaqo ah ku lahayn,” ayuu yiri.
Schumer wuxuu sidoo kale ku eedeeyay madaxweynaha inuu yaraystay culayska dhaqaale ee haysta qoysas badan.
“Runtii waa wax lala yaabo in bilyaneer sida Donald Trump ah uu ku jees jeeso dhibaatada dhaqaale ee dadka inta lagu jiro khudbaddiisa Xaaladda Midowga. Ninkani waxba kama oga. Wuxuu ku jiraa goobo aad u xiran oo uusan ka maqli karin waxa ay dadku la tacaalayaan. Dabcan, wuu ka been sheegay dhaqaalaha,” ayuu raaciyay.
Hoggaamiyaha Dimuqraaddiga ayaa hadalkiisa ku soo gabagabeeyay isagoo ku tilmaamay khudbadda mid “buuxda hadallo madhan iyo buunbuunin.”