HNN: Xiisadda u dhaxaysa Iran iyo Maraykanka ayaa galay marxalad cusub, kadib markii warar kasoo baxay warbaahinta caalamiga ah ay sheegayaan in Iiraan ay si cad u diiday inay dib u bilowdo wada-hadallo ay la yeelato qaar ka mid ah wakiillada Maraykanka.
Sida ay sheegtay CNN, wakiillo Iiraani ah ayaa fariin u diray maamulka Donald Trump, iyagoo cadeeyey inaysan doonayn inay la fariistaan ergayga gaarka ah Steve Witkoff iyo sidoo kale Jared Kushner. Warbaahinta kale sida The Guardian ayaa sidoo kale xaqiijisay in ilo Iiraani ahi ay arrintan xaqiijiyeen, iyagoo sheegay in kooxdan hore ee wada-xaajoodku aysan keenin wax natiijo ah.
Mid ka mid ah ilaha ayaa sheegay in Iiraan ay u aragto codsiga wada-hadalka mid khiyaano ah, islamarkaana ay ka shaki qabto in Maraykanka iyo xulafadiisu ay doonayaan marmarsiiyo ay ku kordhiyaan weerarrada.
Dhanka kale, Iiraan waxay muujisay inay doorbidayso inay si toos ah ula hadasho madaxweyne ku xigeenka Maraykanka, JD Vance. Warbixinnada ayaa sheegaya in Vance loo arko siyaasi ka duwan kuwa kale, maadaama uu muddo dheer ka soo horjeeday faragelinta milatari ee Maraykanka ku hayo dalal kale.
CNN iyo warbaahin kale ayaa sheegaya in JD Vance loo arko in ay ka go’an in xal nabadeed la gaaro, taasoo ka dhigaysa qof ay Iiraan u aragto fursad cusub oo wada-xaajood.
Si kastaba ha ahaatee, Aqalka Cad ayaa si adag uga jawaabay wararkan. Afhayeenka Aqalka Cad, Karoline Leavitt, ayaa sheegtay in go’aanka cidda Maraykanka u metelaysa wada-hadallada uu leeyahay kaliya Donald Trump. Waxay sidoo kale ku tilmaantay wararka qaar kuwo ku saleysan ilo aan la magacaabin, isla markaana qayb ka ah olole dacaayad dibadeed.
Intaas waxaa dheer, Donald Trump ayaa sheegay in JD Vance iyo Marco Rubio ay horey ugu lug lahaayeen dadaallada wada-xaajoodka.
Wararka kale ayaa sheegaya in Maraykanku uu u gudbiyay Iiraan qorshe ka kooban 15 qodob oo looga golleeyahay in lagu soo afjaro colaadda Bariga Dhexe. Qodobadan waxaa ka mid ah:
- In Iiraan ay joojiso kobcinta walxaha loo isticmaali karo hubka nukliyeerka
- In la hubiyo marin xor ah oo maraakiibtu u maraan marinka Strait of Hormuz
- In la joojiyo maalgelinta kooxaha ay Iiraan taageerto sida kuwa ka jira Yemen iyo Lubnaan
Sida ay sheegtay wakaaladda wararka AP, qorshahan ayaa la gaarsiiyay Iiraan iyada oo loo sii marayo dhexdhexaadiyayaal ka socda Pakistan.
Gabagabadii, xaaladdu weli waa mid cakiran oo aan la hubin halka ay ku dambeyn doonto. Inkasta oo ay jiraan calaamado muujinaya suurtagalnimada wada-xaajood, haddana waxaa muuqata kalsooni darro weyn oo u dhaxaysa labada dhinac, taasoo caqabad ku noqon karta in xal degdeg ah la gaaro.
Heemaalaa News Network