Kieran Trippier, oo ah xiddiga rug-cadaaga ah ee kooxda Newcastle United, ayaa laga yaabaa inuu qalinka ku duugo heshiis cusub oo uu ku sii joogayo garoonka St. James’ Park, inkasta oo horay loo hadal hayay inuu xagaaga ka tagayo kooxda. Isbeddelkan lama filaanka ah ayaa yimid ka dib markii ay soo baxeen warar sheegaya in kooxda Arsenal ay si aad ah u baadi-goobayso daafaca midig ee Newcastle, Tino Livramento.
Sida ay werisay Football Insider, haddii Livramento uu u wareego Arsenal, Newcastle waxay dareemaysaa baahi weyn oo loo qabo khibradda iyo hoggaaminta Trippier si ay u buuxiyaan booskaas xilli ciyaareedka dambe. Trippier, oo door muhiim ah ka ciyaaray horumarka kooxda tan iyo markii uu kaga soo biiray Atlético Madrid, ayaa hadda loo arkaa xiddig aan si fudud looga maarmi karin haddii xiddigaha yaryar ee booskiisa kula tartamaya ay baxaan.
Maamulka kooxda ayaa la rumaaysan yahay inay hadda miiska u saari doonaan qandaraas kordhin, iyagoo doonaya inay xaqiijiyaan in difaacoodu uu ahaado mid adag oo khibrad leh tartamada soo socda.