Donald Trump ayaa sheegay inuu si “aan toos ahayn” uga qayb qaadan doono wadahadallada u dhexeeya Iiraan iyo Maraykanka, kuwaas oo la filayo inay ka bilaabmaan Geneva dabayaaqada Talaadada.
Isagoo la hadlayay wariyeyaasha saarnaa diyaaradda Air Force One, madaxweynaha Maraykanka ayaa intaas ku daray inuu aaminsan yahay in Iiraan rabto inay heshiis ka gaarto barnaamijkeeda nukliyeerka.
Wareegga labaad ee wadahadallada ka dhacaya Switzerland ayaa ku soo beegmaya hanjabaado milatari oo isdaba joog ah oo ka dhan ah Iiraan, kuwaas oo la xiriira caburinta rabshadaha leh ee ay ku samaysay mudaharaadyada ka dhanka ah dowladda iyo khilaafka sii socda ee ku saabsan barnaamijkeeda nukliyeerka.
Isniintii, wasaaradda arrimaha dibadda ee Tehran ayaa sheegtay inay rumeysan tahay in mowqifka Maraykanka ee arrinta nukliyeerka uu u wareegay “mid ka dhab ah oo macquul ah”.
Iiraan waxay sheegtay in kulanka Talaadada, oo ay dhexdhexaadinayso Cumaan, diiradda lagu saari doono barnaamijkeeda nukliyeerka iyo suurtagalnimada in laga qaado cunaqabateynta dhaqaale ee Maraykanku saaray. Washington ayaa hore u muujisay inay rabto in sidoo kale laga wada hadlo arrimo kale, sida kaydka gantaallada Iiraan.
Isagoo wadahadallada ku tilmaamay “aad muhiim u ah”, Trump wuxuu soo jeediyay in Tehran markan ay dhab ka tahay wadaxaajoodka.
“Uma maleynayo inay rabaan cawaaqibka ka dhalan kara haddii heshiis la gaari waayo,” ayuu yiri Trump, isagoo intaas ku daray in Iiraan ay baratay cawaaqibka mowqif adag markii xagaagii hore Maraykanku duqeeyay goobaha nukliyeerka ee Iiraan.
“Waxaan heli kari lahayn heshiis halkii aan ka diri lahayn diyaaradaha B-2 si ay u burburiyaan awooddooda nukliyeerka. Laakiin waa inaan dirno B-2-yada,” ayuu yiri Trump, isagoo tixraacaya diyaaradaha qarsoodiga ah ee fuliyay duqeymaha. “Waxaan rajeynayaa inay noqdaan kuwo ka macquulsan.”
Hanjabaadaha madaxweynaha ayaa ku soo beegmaya iyadoo Maraykanku kordhiyay awooddiisa milatari ee Bariga Dhexe toddobaadyadii la soo dhaafay.
BBC Verify ayaa xaqiijisay goobta uu ku sugan yahay markabka dagaalka qaada diyaaradaha ee USS Abraham Lincoln, kaas oo ku dhow Iiraan, iyadoo la adeegsanayo sawirro dayax-gacmeed.
Sidoo kale, waxaa la sheegay in Maraykanku u diray Bariga Dhexe markabka dagaalka ee USS Gerald R Ford, oo ah kan ugu weyn dunida, kaas oo la filayo inuu gobolka gaaro saddexda toddobaad ee soo socda gudahood.
Marka laga soo tago imaatinka Abraham Lincoln, BBC Verify waxay sidoo kale ogaatay koror ku yimid maraakiibta burburiya (destroyers), maraakiibta dagaalka iyo diyaaradaha dagaalka ee Maraykanka ee gobolka.
Wasiirka Arrimaha Dibadda ee Iiraan, Abbas Araqchi, ayaa Isniintii la kulmay madaxa hay’adda Qaramada Midoobay u qaabilsan kormeerka nukliyeerka, isagoo qoraal ku daabacay X ku sheegay inuu joogo Geneva si uu “u gaaro heshiis caddaalad iyo sinaan leh”.
“Waxa aan miiska saarneyn: is-dhiibid ka hor hanjabaad,” ayuu yiri Araqchi.
Iiraan ayaa sidoo kale uga jawaabtay kordhinta ciidamada Maraykanka muujin awood milatari. Isniintii, Ciidanka Ilaalada Kacaanka Islaamiga ah (IRGC) ayaa sameeyay dhoolatus badeed oo ka dhacay marin-biyoodka Strait of Hormuz, oo ku yaalla Gacanka u dhexeeya Cumaan iyo Iiraan.
Marinkan ayaa loo arkaa marin-biyood caalami ah oo aad muhiim u ah iyo waddo saliid laga dhoofiyo oo ay isticmaalaan dalalka Carabta ee Gacanka.
Washington ayaa u dirtay ergayga Bariga Dhexe Steve Witkoff iyo soddogga Trump, Jared Kushner, sida Aqalka Cad uu sheegay Axaddii.
Xoghayaha Arrimaha Dibadda ee Maraykanka, Marco Rubio, ayaa sheegay in gaarista heshiis lala gaaro Tehran ay noqon doonto “mid aad u adag”.
“Waxaan u maleynayaa inay jirto fursad diblomaasiyadeed oo lagu gaari karo heshiis… laakiin sidoo kale ma doonayo inaan buunbuuniyo,” ayuu yiri Rubio intii uu booqanayay Hungary Isniintii. “Way adkaan doontaa.”