Wasaaradda arimaha dibadda Türkiye ayaa Talaadadii beenisay warar ay daabaceen qaar ka mid ah warbaahinta oo sheegaya in Turkigu ay isu diyaarinayo in uu galo dhulka Iiraan haddii Mareykanku weerar ku qaado.
“Wararka ka soo baxay qaar ka mid ah warbaahinta ee sheegaya in ‘Türkiye ay qorsheyneyso inay ku duusho dhulka Iiraan sababo amni awgood haddii Mareykanku weerar ku qaado Iiraan’ waa warar been abuur ah,” ayay Waaxda Isgaarsiinta ku sheegtay barteeda ku taalla madasha shirkadda baraha bulshada ee X.
Waaxdu waxay carrabka ku adkeysay in Türkiye ay muddo dheer ka go’an tahay ixtiraamka midnimada dhuleed iyo madaxbannaanida dalalka deriska la ah.
Waxay intaas ku dartay in Ankara ay si joogto ah u qaaddo tallaabooyinka lagama maarmaanka ah si loo ilaaliyo xuduudaha dalka, iyadoon loo eegin xiisadaha ka jira gobolka.
“Türkiye, oo si joogto ah u ilaalisa ixtiraamka midnimada dhuleed iyo madaxbannaanida dalalka deriska la ah, waxay qaaddaa dhammaan tallaabooyinka lagama maarmaanka ah si loo xaqiijiyo amniga xuduudaheeda 24 saacadood maalintii, hadday jirto xaalad qalalaase ama mid kale,” ayay mar kale ku adkaysay hadalkeega.
Waaxdu sidoo kale waxay ugu baaqday dadweynaha inaysan rumaysan warar aan la xaqiijin, balse ay ku tiirsanaadaan oo keliya bayaanada rasmiga ah ee ay soo saaraan hay’adaha awoodda u leh.