Ugu yaraan sagaal qof ayaa ku geeriyooday rabshado culus oo ka dhacay meel u dhow Qunsuliyadda Maraykanka ee magaalada Karachi ee Pakistan, kaddib mudaharaadyo xooggan oo ka dhashay dilka hoggaamiyihii sare ee Iran, Ayatollah Cali Khamenei.
Sida ay baahisay Al Jazeera, boqolaal qof oo taageerayaal u ahaa Iran ayaa saacadihii hore ee Axaddii isugu soo baxay afaafka hore ee qunsuliyadda, iyagoo isku dayay inay gudaha u galaan xarunta. Ciidamada ammaanka ayaa rasaas furay si ay u kala eryaan dadkii mudaharaadayay, taas oo sababtay dhimashada ugu yaraan sagaal qof iyo dhaawaca tiro kale.
Dhakhtar ka tirsan isbitaalka rayidka ee Karachi ayaa xaqiijiyay in sagaalka meyd ah la keenay xarunta caafimaadka, halka dhaawacyada qaar lagu daweynayo xaalado kala duwan. Muuqaallo lagu baahiyay baraha bulshada ayaa muujinayay dad dhaawac ah oo ay qaadeen shacab goobta ku sugnaa, iyo kooxo isku dayaya inay jebiyaan albaabbada amniga ee qunsuliyadda ku taalla waddada Mai Kolachi.
Rabshaduhu kuma ekaan Karachi oo keliya. Magaalada Skardu ee gobolka Gilgit-Baltistan, oo ay ku badan yihiin Shiicadu, mudaharaadayaal ayaa dab qabadsiiyay xafiis ay leedahay Qaramada Midoobay. Mas’uul u hadlay maamulka deegaanka ayaa sheegay in dhismaha la gubay, balse lama soo sheegin wax dhimasho ah.
Sidoo kale, magaalada Lahore, boqolaal qof ayaa isugu soo baxay bannaanka qunsuliyadda Maraykanka. Inkasta oo qaar ka mid ah mudaharaadayaashu isku dayeen inay waxyeelleeyaan albaabka amniga, haddana boolisku waxay ku guuleysteen inay kala diraan iyaga oo aan adeegsan xoog.
Mudaharaadyo la xidhiidha dilka Khamenei ayaa sidoo kale laga soo sheegay dalal kale sida Ciraaq, Morocco iyo Kashmir-ta Hindiya maamusho. Magaalada Baqdaad, taageerayaal Iran u janjeedha ayaa isugu soo baxay agagaarka Aagga Cagaaran halkaas oo ay ku taallo safaaradda Maraykanka.
Dhacdooyinkan ayaa ku soo beegmaya xilli xiisad weyn ay ka taagan tahay gobolka, kaddib weerarro wadajir ah oo Maraykanka iyo Israa’iil ku qaadeen Iran, kuwaas oo sababay dilka hoggaamiyihii sare ee dalkaas. Xaaladda Pakistan ayaa weli kacsan, iyadoo la filayo dibadbaxyo kale inay ka dhacaan caasimadda Islamabad saacadaha soo socda.