Shiinaha oo si buuxda u Taageeray Itoobiya, kana hadlay Arrimaha badda iyo Xasilloonida Geeska Afrika

Wasiirka Arrimaha Dibadda ee Shiinaha ayaa wada-hadallo ballaaran la yeeshay Ra’iisul Wasaaraha Itoobiya Abiy Axmed iyo Wasiirka Arrimaha Dibadda Itoobiya Gideon Timothewos, kuwaas oo aan ku koobnayn oo keliya arrimaha gudaha ee labada dal, balse sidoo kale taabanayay arrimaha gobolka iyo kuwa caalamiga ah. Arrintan ayaa lagu caddeeyay war-saxaafadeed wadajir ah oo ay labada dowladood soo saareen Jimcihii.

Dowladda Shiinaha ayaa muujisay sida ay ugu faraxsan tahay “guulaha cusub” ee laga diiwaangeliyay horumarka qaran ee Itoobiya, iyadoo hoosta ka xarriiqday taageerada buuxda ee ay u hayso dadaalka shacabka Itoobiya ugu jiraan inay ku doortaan dariiq horumarineed oo waafaqsan duruufaha dalka. Sidoo kale, Beijing ayaa si cad uga hortimid wax kasta oo ay ku tilmaantay “faragelin shisheeye” oo lagu sameeyo arrimaha gudaha ee Itoobiya.

War-saxaafadeedka ayaa lagu sheegay in labada dal ay ku heshiiyeen xoojinta is-waafajinta siyaasadaha horumarinta iyo istaraatiijiyadaha qaranka, iyo sidoo kale dhiirrigelinta is-dhaafsiga khibradaha la xiriira maamulka dadweynaha.

Shiinaha ayaa si gaar ah u bogaadiyay doorka Itoobiya ee Geeska Afrika, halka dowladda Itoobiya ay dhankeeda soo dhoweysay “guulaha laga gaaray qorshaha nabadda iyo horumarinta ee Shiinaha ee Geeska Afrika,” taas oo muujinaysa iskaashi sii xoogeysanaya oo ku wajahan xasilloonida gobolka.

Arrimaha la xiriira badda iyo is-dhexgalka gobolka ayaa si gaar ah looga hadlay. Shiinaha ayaa ku booriyay waddamada Geeska Afrika inay qaadaan tallaabooyin lagu xoojinayo xiriirka, iskaashiga iyo is-dhexgalka Afrika, gaar ahaan dhinacyada dhaqaalaha iyo kaabeyaasha.

Tani waxay imanaysaa xilli Itoobiya ay horraantii 2024 heshiis la saxiixatay Jamhuuriyadda iskeed ugu dhawaaqday madaxbannaanida ee Somaliland, heshiiskaas oo la sheegay inuu Itoobiya u oggolaanayo inay hesho marin badeed muhiim ah, hase yeeshee ay si adag uga soo horjeesatay dowladda Soomaaliya.

Shiinaha ayaa sheegay in horumarinta saadka badda ay tahay tiir muhiim u ah xoojinta xiriirka gobolka, isagoo tilmaamay in helitaanka “albaab badeed” uu ka mid yahay hababka lagu gaari karo yoolkaas. Beijing ayaa sidoo kale carrabka ku adkeysay in arrimaha la xiriira badda loo adeegsado sidii loo xaqiijin lahaa nabad, xasillooni iyo barwaaqo gobolka, isla markaana lagu wajaho wada-hadal iyo dariiq diblomaasiyadeed.

Dhanka kale, Shiinaha ayaa caddeeyay in dhammaan dadaalladan ay ku saleysan yihiin ixtiraamka madaxbannaanida iyo midnimada dhuleed ee dalalka ay khusayso, iyo u hoggaansanaanta Axdiga Qaramada Midoobay iyo sharciga caalamiga ah.

Gebogebadii, Itoobiya ayaa mar kale ku celisay taageerada ay u hayso mowqifka Shiinaha ee ku aaddan Taiwan, arrin muddooyinkii dambe xiisad dhalisay. Shiinaha ayaa Taiwan u arka qayb ka mid ah dhulkiisa, iyadoo dhoolatusyo militari oo uu ka sameeyay meel u dhow jasiiraddaasi ay sare u qaadeen welwelka laga qabo in Beijing ay tallaabo militari qaaddo mustaqbalka.