Maamulka Trump ayaa sheegay in weli la tixgelinayo weerarro milatari oo lagu qaado Iiraan.

Maamulka Madaxweynaha Maraykanka Donald Trump ayaa sii wada hanjabaadaha ku saabsan weerarro milatari oo ka dhan ah Iiraan, iyagoo sheegay in weerarrada cirka ay ka mid yihiin “xulashooyin badan” oo la eegayo, xilli mudaaharaadyo ballaaran ay cadaadis xooggan saarayaan dowladda Iiraan.

Afhayeenka Aqalka Cad Karoline Leavitt ayaa Isniintii sheegtay in diblomaasiyaddu ay tahay “mar walba xulashada koowaad”, balse weerarro milatari ay weli miiska saaran yihiin.

“Hal shay oo uu Madaxweyne Trump aad ugu fiican yahay waa inuu mar walba dhammaan xulashooyinka miiska saaro. Weerarrada cirka waxay ka mid noqon karaan xulashooyinka badan ee uu taliyaha guud haysto,” ayay Leavitt u sheegtay wariyeyaasha.

Trump, oo bishii Juun duqeeyay xarumo nukliyeer oo Iiraan leedahay, horayna ugu hanjabay Tehran weerarro kale haddii aysan la jaanqaadin dalabaadka Maraykanka, ayaa adeegsaday xakamaynta adag ee dowladda ee dibadbaxayaasha si uu marmarsiiyo ugu helo weerarro milatari oo dheeraad ah oo ka dhan ah dalka iiraan.

Weerar Maraykanku ku qaado Iiraan waxa ay u badan tahay inuu jabiyo sharciga caalamiga ah, iyadoo Trump si joogto ah ugu hanjabo dalalka ka hor yimaada rabitaankiisa weerarro milatari oo suurtagal ah.

Wargeyska The Wall Street Journal ayaa Isniintii sheegay in qaar ka mid ah xubnaha maamulka Trump, sida Madaxweyne-ku-xigeenka JD Vance, ay ku boorinayaan Trump inuu tixgeliyo dib u bilaabidda dadaallo diblomaasiyadeed oo lala yeesho Tehran ama xulashooyin kale oo ka fudud weerarrada Maraykanka, iyagoo soo xiganaya mas’uuliyiin Maraykan ah oo magacyadooda la qarinayo. Madaxweynaha Maraykanka ayaa Axaddii sheegay in Iiraan ay “soo wacday” oo ay doonayso “wadahadal”.

“Waxa aad si dadweyne ah uga maqleysaan nidaamka Iiraan aad ayuu uga duwan yahay farriimaha uu maamulka si gaar ah u helayo,” ayay tiri Leavitt.

“Madaxweynuhu waxa uu muujiyay inuusan ka cabsan isticmaalka awood milatari haddii iyo marka uu u arko inay lagama maarmaan tahay, taasna Iiraan cid ka og si ka wanaagsan ma jirto,” ayay hadalkeeda ku soo gabagabeysay.