Ra’iisul Wasaaraha Britain, Keir Starmer, ayaa Khamiistii soo afjaray qaadacaaddii uu ku hayay shirkadda baraha bulshada ee Mareykanka laga leeyahay ee X, isagoo sheegay in shirkaddu ay “qaadday tallaabooyin ay si buuxda ugu hoggaansamayso sharciga UK.”
Qoraal uu Khamiistii ku daabacay madasha X, ayuu Starmer dib ugu soo laabtay baraha bulshada ee uu leeyahay maalqabeenka Mareykanka ah Elon Musk, markii ugu horreysay tan iyo 8-dii Janaayo, markaas oo uu ka fogaaday madasha kaddib muran ka dhashay qalabka sirdoonka macmalka ah ee Grok iyo abuurista sawirro galmo loo ekaysiiyey oo haween iyo carruur ah, kuwaas oo aan oggolaansho laga haysan.
Xorriyadda hadalku ma aha xorriyad lagu jebin karo oggolaanshaha dadka. Sawirrada haweenka da’da yar ma aha hanti dadweyne, amnigooduna ma aha arrin laga doodo,
Wuxuu intaa ku daray: “Waan soo dhoweynayaa in X ay hadda tallaabo qaadayso si ay si buuxda ugu hoggaansanto sharciga UK – waana inay taasi dhacdaa isla markiiba.”
Starmer wuxuu sidoo kale muujiyay inuu diyaar u yahay in tallaabooyin dheeraad ah la qaado si loo xoojiyo badbaadada internet-ka, isagoo yiri: “Haddii ay noqoto mid lagama maarmaan ah in sharciyada hadda jira la adkeeyo, waan diyaar u nahay inaan sidaas samayno.”
Muranka ayaa billowday kaddib warbixino sheegayay in chatbot-ka AI-ga ah ee X, Grok, loo adeegsanayay in lagu sameeyo tafatirro aan habboonayn oo sawirrada haweenka iyo carruurta ah, taas oo dhalisay walaac ballaaran oo ku saabsan waxyeellada internet-ka iyo suurtagalnimada in la jebiyay Sharciga Badbaadada Internet-ka ee UK.
Hay’adda kormeerka badbaadada internet-ka ee UK, Ofcom, ayaa Isniintii furtay baaritaan rasmi ah oo ku saabsan X, kaddib walaac laga muujiyay in qalabka AI-ga ee Grok loo adeegsanayo abuurista sawirro galmo loo ekaysiiyey.
Hay’addu waxay baari doontaa in X ay ku guuldareysatay inay buuxiso waajibaadyo muhiim ah oo ku xusan Sharciga Badbaadada Internet-ka, kuwaas oo ay ka mid yihiin in si sax ah loo qiimeeyay halista ay isticmaaleyaasha UK ula kulmi karaan waxyaabo sharci-darro ah, iyo in shirkaddu samaysay qiimeyn khatar oo la cusboonaysiiyay ka hor inta aan wax isbeddel weyn ah lagu samayn adeeggeeda.