Tiro badan oo askar Yurub ah ayaa maalmahan gaaray dalka Greenland, kaddib markii la bilaabay dhaqdhaqaaq milatari oo xooggan oo u dhexeeya qaaradda Yurub iyo jasiiradda Greenland. Habeenkii Jimcaha, ciidamada difaaca Denmark ayaa xaqiijiyay in diyaarado militari oo ay leeyihiin Denmark iyo Faransiisku ay ka fuliyeen hawlgal iyo tababar militari hawada Greenland.
Wararka ayaa sheegaya in uu socdo socdaal joogt ah oo u dhexeeya Yurub iyo Greenland, iyadoo diyaaradaha xamuulka militari ee Denmark, Faransiiska iyo Jarmalku ay wadaan askar iyo qalab ciidan. Galabnimadii Jimcaha, tiro badan oo askar ah ayaa ka degay caasimadda Greenland ee Nuuk.
Sida ay baahisay Danmarks Radio (DR), askartaasi waxa ka mid ah ciidamo dagaal oo Denmark ah iyo cutubka gaarka ah ee loo yaqaan Jægerkorpset, kuwaas oo si gaar ah loogu tababaray ka hawlgalka xaaladaha adag ee Arctic-ga. Sawirro la baahiyay ayaa sidoo kale muujinaya in askar Jarmal ah ay ku sugan yihiin magaalada Nuuk.
Markii ay yimaadeen, askarta ayaa warbixin amni iyo mid hawlgal ku qaadatay xarunta taliska Arktik Command (Arktisk Kommando), oo ah hay’adda qaabilsan difaaca Greenland iyo Jasiiradaha Faroe, kana tirsan ciidamada Denmark.
Horraantii toddobaadkan, Wasaaradda Difaaca Denmark iyo xukuumadda Greenland ayaa shaaciyay in la kordhin doono joogitaanka militari ee Greenland, inkastoo aan weli si rasmi ah loo ogeyn tirada guud ee askarta loo dirayo waqooyiga.
Tababar militari oo lala yeeshay Faransiiska
Ciidamada difaaca Denmark ayaa sidoo kale sheegay in laba diyaarad oo dagaal oo nooca F-35 ah iyo diyaarad ah kuwa shidaalka hawada sare ku siiya dayaaradaha dagaalka ee militariga oo Faransiisku leeyahay ah ay Jimcihii sameeyeen tababar wadajir ah oo ka dhacay koonfur-bari Greenland. Tababarka ayaa diiradda lagu saarayay hawlgallo wadajir ah, shidaal-siinta hawada sare, duullimaadyo masaafo dheer ah iyo xaqiijinta badbaadada hawlgallada xaaladaha qabow ee Arctic-ga.
Tababarka ayaa ka dhacay agagaarka Kulusuk, oo ku yaalla xeebta bari ee Greenland. Diyaaradda Faransiiska ayaa ka soo duushay saldhig ku yaalla koonfurta Faransiiska, waxayna dib ugu laabatay saldhiggeedii markii tababarku soo dhammaaday.
Taliyaha Arktisk Kommando, Søren Andersen, oo wareysi siiyay wakaaladda wararka Reuters isaga oo saaran markab dagaal oo ku sugnaa Nuuk, ayaa sheegay in diiradda ugu weyn ee taliskiisu aysan ahayn Mareykanka, inkastoo ay jirto xiisad la xiriirta hadallada Madaxweynaha Mareykanka ee ku aaddan Greenland.
“Diiraddaydu gebi ahaanba kuma wajahana Mareykanka. Diiraddaydu waxay ku wajahan tahay Ruushka,” ayuu yiri Søren Andersen.
Kordhinta joogitaanka milatari ee Greenland ayaa imanaysa xilli ay sii kordhayaan loollanka istaraatiijiga ah ee quwadaha waaweyn, gaar ahaan Arctic-ga, oo ah goob muhiim u ah amniga iyo saameynta caalamiga ah.