Duqa magaalada Minneapolis, Jacob Frey, ayaa sheegay inuusan “ka baqi doonin” wararka sheegaya in maamulka Trump uu bilaabay baaritaan ku saabsan hadallo uu jeediyay isagoo isku dayayay inuu joojiyo weerarro rabshado wata oo la xiriira socdaalka (immigration) oo ka dhacay magaalada.
Warbaahinno badan ayaa Jimcihii sheegay in Waaxda Caddaaladda Mareykanka (DOJ) ay furtay baaritaan dambiyeed oo ka dhan ah Frey, iyo sidoo kale Guddoomiyaha Minnesota Tim Walz, oo ahaa musharraxii Dimuqraadiga ee madaxweyne-ku-xigeenka doorashadii 2024. Baaritaankan ayaa la sheegay inuu la xiriiro eedeymo ah inay hadalladooda caqabad ku noqdeen fulinta sharciga federaalka.
Baaritaanka waxaa markii ugu horreysay werisay CBS News, inkasta oo Waaxda Caddaaladda aysan si rasmi ah u xaqiijin waqtigaas.
“Arrintani waa isku day cad oo la doonayo in laygu cabsi-geliyo anigoo u istaagay Minneapolis, booliiska maxalliga ah, iyo dadka degan magaalada, si aan uga hortago fowdada iyo khatarta uu maamulkani keenay,” ayuu Frey ku yiri qoraal uu soo dhigay baraha bulshada ee X.
“Lama cabsi-gelin doono. Diiraddaydu weligeed sida ay ahayd ayay ahaanaysaa, in aan hubiyo badbaadada magaaladeenna,” ayuu ku daray.
Guddoomiye Tim Walz ayaa si dadban uga falceliyay wararka sheegaya in isagana la baarayo, isagoo bayaan ku yiri, “Hub u adeegsiga nidaamka caddaaladda iyo handadidda mucaaradka siyaasadeed waa xeelad khatar ah oo kali-talisnimo ah.
“Laba maalmood ka hor waxay ahayd Elissa Slotkin. Toddobaadkii hore Jerome Powell. Intaas ka hor Mark Kelly,” ayuu Walz ku daray.
Senator-rada Mareykanka ee Kelly (Arizona) iyo Slotkin (Michigan) ayaa waxaa baaraya maamulka Trump kaddib markii ay la soo muuqdeen sharci-dejiye Dimuqraadi ah oo kale muuqaal ah (video) oo ku boorinaya xubnaha militariga inay ka horyimaadaan “amarro sharci-darro ah” oo ay ka helaan madaxda sare.
Maamulka Trump ayaa sidoo kale bilaabay baaritaan dambiyeed oo ka dhan ah Jerome Powell, taas oo ah markii ugu horreysay ee guddoomiye hadda xilka haya oo ka tirsan Bangiga Dhexe ee Federaalka (Federal Reserve) la baaro.
Wararka ku saabsan baaritaanka Frey iyo Walz ayaa yimid xilli faahfaahin dheeraad ah la shaaciyay Jimcihii oo ku saabsan dilkii toogashada ahaa ee loo geystay haweeney degganeyd Minneapolis, Renee Nicole Good, taas oo ay toogteen sarkaal ka tirsan Hay’adda Socdaalka iyo Kastamyada Mareykanka (ICE), Jonathan Ross, toddobaadkii hore.
Diiwaannada waaxda dab-damiska ayaa muujiyay in kooxda gurmadka caafimaadku, ay ka heleen dhibbanaha iyada oo miyir-beel ah gudaha gaarigeeda, iyadoo lahayd afar dhaawac oo rasaas ah, oo ay ku jiraan mid madaxa ah iyo laba xabadood oo laabta ah.
Gurmadka caafimaadku waxay isku dayeen inay badbaadiyaan nolosheeda goobta iyo intii ay ambalaaska kula sii socdeen isbitaalka. Waxaa la xaqiijiyay dhimashadeeda wax ka yar saacad kaddib markii la toogtay.
Maamulka Trump ayaa sheegay in sarkaalka ICE ee toogtay Good, kaas oo aan weli wax dacwad ah lagu soo oogin, uu ku dhaqmay is-difaacid.
Mas’uuliyiin sare oo ka tirsan maamulka Trump, oo ay ku jiraan madaxweyne-ku-xigeenka Mareykanka JD Vance iyo la-taliyaha Aqalka Cad Stephen Miller, ayaa sheegay in saraakiisha ICE ay leeyihiin “xasaanad buuxda” oo ku saabsan falalkooda.