Ra’iisul Wasaaraha Sweden ayaa Sabtidii sheegay in waddamada xulafada ah aysan marnaba u hoggaansami doonin “cadaadis iyo handadaad”, kaddib markii Madaxweynaha Maraykanka Donald Trump uu ku dhawaaqay canshuuro cusub oo la xiriira arrinta Greenland, isagoo intaas ku daray in ay socdaan wadahadallo ku aaddan “jawaab mideysan”.
“Ma oggolaan doonno in nala handado ama nala cadaadiyo. Kaliya Denmark iyo Greenland ayaa go’aamin kara arrimaha khuseeya Denmark iyo Greenland,” ayuu Ulf Kristersson ku qoray barta bulshada ee X.
Isagoo sheegay in uu “mar walba” difaaci doono dalkiisa iyo deriska xulafada ah, ayuu xusay in tani ay tahay arrin Midowga Yurub (EU) khusayso, isla markaana ay saameynayso dalal ka badan kuwa hadda si gaar ah loo bartilmaameedsanayo.
“Sweden hadda waxay wadahadallo adag la waddaa dalalka kale ee EU-da, Norway, iyo Boqortooyada Ingiriiska si loo helo jawaab wadajir ah,” ayuu raaciyay Kristersson.
Hadalladiisa ayaa yimid kaddib markii Madaxweyne Donald Trump uu horraantii Sabtida sheegay in Washington ay canshuuro cusub ku soo rogi doonto badeecadaha ka imanaya siddeed dal oo Yurub ah laga bilaabo 1-da Febraayo, iyadoo heerarka canshuuraha ay si weyn u kordhi doonaan bisha Juun, taas oo uu ku sababeeyay “walaac amni qaran” oo la xiriira Greenland.
Greenland, oo ah dhul is-maamula kana tirsan Boqortooyada Denmark, ayaa soo jiidatay danaha Maraykanka sababo la xiriira goobteeda istaraatiijiga ah, kheyraadkeeda macdanta oo aad u ballaaran, iyo welwel la xiriira kordhinta dhaqdhaqaaqa Ruushka iyo Shiinaha.
Trump ayaa marar badan sheegay in Maraykanku uu khasab ku yahay inuu la wareego Greenland si loo ilaaliyo ammaanka qaranka, loogana hortago in Ruushka ama Shiinaha ay gacanta ku dhigaan dhulkaas.
Labada dal ee Denmark iyo Greenland ayaa si cad u diiday soo jeedin kasta oo ku saabsan in la iibiyo dhulkaasi, iyagoo mar kale adkeeyay madax-bannaanida Denmark ee jasiiradda.