Madaxweynaha Israa’iil oo maanta ka hadlay Madasha Dhaqaalaha Adduunka (World Economic Forum) ee ka socota magaalada Davos ayaa sheegay in waxa keliya ee mustaqbal u noqon kara Iiraan ay tahay isbeddel lagu sameeyo nidaamka talada dalkaas.
Madaxweynaha ayaa hadalkiisa ku adkeeyay in Iiraan ay wajahaysa caqabado waaweyn oo la xiriira xaaladda siyaasadeed, amniga iyo xiriirka caalamiga ah, isagoo tilmaamay in isbeddel nidaam uu yahay waddada kaliya ee xal waara lagu gaari karo.
“Isbeddelka nidaamka ayaa noqon karo mustaqbalka kaliya ee Iiraan.”
ayuu yiri Madaxweynaha Israa’iil isagoo wareysi bixinaya Davos.
Hadalkan ayaa imanaya xilli ay sare u kacayaan xiisadaha gobolka Bariga Dhexe, islamarkaana ay jiraan walaacyo caalami ah oo la xiriira saameynta Iiraan ku leedahay xaaladaha amni iyo siyaasadeed ee gobolka.
Dhinaca kale, hadalka Madaxweynaha Israa’iil ayaa si weyn u qabsaday warbaahinta iyo falanqeeyayaasha siyaasadda, kuwaas oo sheegay in arrintan ay sii hurin karto doodaha ku saabsan mustaqbalka Iiraan iyo doorka ay ku leedahay amniga gobolka.