“Ma aysan iman dalka si sharci-darro ah mana aha dambiilayaal,” ayuu yiri qareenka qoyska.
“Maxaa loo xirayaa ilmo shan jir ah? Ha ii sheegin in la doonayo in loo aqoonsado dambiile rabshado wata.”
Arrintan waxaa tiri Zena Stenvik, kormeeraha Dugsiyada Dadweynaha ee Columbia Heights, intii lagu jiray shir jaraa’id oo Arbacadii la qabtay.
Sida uu qoray The Washington Post, Liam Ramos oo shan jir ah iyo aabbihiis Adrian Alexander Conejo Arian ayaa ICE xabsiga u taxaabtay Talaadadii, xilli uu wiilku ka soo laabtay xannaano (dugsi-hore) oo ku taalla Minnesota.
Liam wuxuu ahaa arday ka tirsan dugsiga ay Stenvik maamusho, waxayna shir jaraa’id ku sheegtay in iyadu ay si shaqsi ah guriga u geysay wiilka kadib markii ay maqashay waxa dhacay.
“Qof weyn oo kale oo guriga deggenaa ayaa bannaanka joogay, wuxuuna baryayay ciidnaku inay u oggolaadaan inay daryeelaan ilmaha yar, balse way diideen,” ayay CNN qortay.
Dugsiga Liam ayaa ku eedeeyay mas’uuliyiinta Mareykanka inay ilmaha u adeegsadeen sidii “dabinn”, sida ay weriyeen warbaahinta Mareykanka.
Sida ay sheegtay kormeeruhu, askari booliis ah ayaa Liam ka soo saaray gaariga, u kaxeeyay albaabka guriga, kuna yiri inuu garaaco albaabka si loo furo.
Ujeeddadu waxay ahayd in la hubiyo in qof kale oo weyn uu guriga joogay iyo in kale, ayay tiri Stenvik.
Qof weyn oo kale ayaa ka codsaday booliiska inaysan xirin wiilka shan jirka ah. Walaalka Liam ayaa guriga yimid 20 daqiiqo kadib.
Kuwana waa laga yaabaa in aad xiisaynayo
Qoys magangelyo-doon ah
Qareenka qoyska, Marc Prokosch, ayaa sheegay in qoyska uu lahaa dacwad magangelyo oo socotay.
Intii lagu jiray shir jaraa’id, waxaa la soo bandhigay dukumiinti muujinaya in qoyska ay Mareykanka ku soo galeen si rasmi ah, iyagoo soo maray xarun aqbalaad. “Qoysku waxay sameeyeen wax walba oo sharcigu farayo,” ayuu yiri Prokosch, wuxuuna raaciyay: “Kuma aysan iman dalka si sharci-darro ah mana aha dambiilayaal.”
Ma jirin amar lagu farayay inay dalka ka baxaan.
Qareen Prokosch ayaa sheegay in Liam iyo aabbihiis ay ku sugan yihiin San Antonio, halkaas oo ay gacanta ku hayso Wasaaradda Amniga Gudaha (Department of Homeland Security). Wuxuu carrabka ku adkeeyay in qoyska “ay si buuxda u raaceen nidaamka sharciga — laga bilaabo isdiiwaangelinta xadka ilaa codsiga magangelyada iyo sugitaanka go’aanka.”
Marka laga reebo Liam, saddex arday oo kale oo ka tirsan Columbia Heights ayaa la qabtay bishan. Waxaa ka mid ah wiil 17 jir ah oo ku sii jeeday dugsiga iyo ilmo 10 jir ah oo la socday hooyadiis.
ICE oo ka jawaabtay
Tricia McLaughlin oo ka tirsan Wasaaradda Amniga Gudaha ayaa sheegtay in ICE ay fulisay hawlgal si gaar ah loogu bartilmaameedsanayey qabashada aabbaha Liam, oo ay ku tilmaantay “muhaajir sharci-darro ah”.
McLaughlin waxay sheegtay in hawlgalku uusan ku wajahneyn wiilka shan jirka ah, isla markaana ay ku doodday in aabbuhu isku dayay inuu baxsado.
“Si loo ilaaliyo badbaadada ilmaha, mid ka mid ah saraakiishayada ayaa la joogay ilmaha, halka aabbaha la qabtay,” ayay tiri.
Sida ay sheegtay, aabbaha waxaa la siiyay fursad uu wiilka ugu dhiibo qof ammaan ah. Arrintan ayaa dugsiga si cad u beeniyay.
Guddoomiyaha gobolka Minnesota, Tim Walz, ayaa ku qoray bartiisa X:
Minnesotans want safety. They want freedom. They want what’s best for our kids.
Masked agents snatching preschoolers off the street and sending them to Texas detention centers serves none of those purposes.
This campaign of retribution has got to stop.https://t.co/DYXvNF0SKa
— Governor Tim Walz (@GovTimWalz) January 22, 2026
“Dadka Minnesota waxay rabaan ammaan. Waxay rabaan xorriyad. Waxay rabaan waxa ugu wanaagsan carruurteenna. Ciidamo wajiyada qarsaday oo carruur yaryar ka jiidaya waddooyinka una diraya xeryo xabsi oo ku yaalla Texas midna kama dhaco rabitaannadaas. Ololahan aargoosiga ah waa inuu istaagaa.”
Madaxweyne-ku-xigeenka oo taageeray ICE
Madaxweyne-ku-xigeenka Mareykanka, JD Vance, ayaa shir jaraa’id oo Khamiistii fiidkii la qabtay ku sheegay in Liam aan la xirin.
“Anigu waxaan ahay aabbe wiil shan jir ah, waxaanan is iri: Ilaahayow, tani waa wax laga naxo. Sidee baan u xirnay ilmo shan jir ah?” ayuu yiri.
Laakiin wuxuu ku adkeystay in taasi aysan ahayn waxa dhacay.
“Waxaan sameeyay baaritaan yar, waxaana ogaaday in wiilka shan jirka ah aan la xirin, balse aabbihiis uu ahaa muhaajir sharci-darro ah,” ayuu yiri Vance.
“Maxay markaa sameeyaan? Ma ilma shan jir ah bay u daayaan inuu qabow ku dhinto? Mise ma qabtaan muhaajir sharci-darro ah oo ku sugan Mareykanka?”
Vance wuxuu carrabka ku adkeeyay in waalidiintu aysan heli karin difaac ay kaga badbaadaan fulinta sharciga oo keliya sababta oo ah carruur bay leeyihiin, balse wuxuu qiray in xaaladdu ay si daran u saameyso carruurta ku lugta leh.
“Waa nasiib darro in carruurtu ay ku dhacaan xaaladdan,” ayuu hadalkiisa ku soo gabagabeeyay.