Dowladda Soomaaliya ayaa sheegtay inay xal ka gaartay khilaaf si fagaare ah u dhex maray safaaradaheeda Kenya iyo Tanzania, taasoo yareysay walaac laga qabay kala qeybsanaan gudaha ah oo ku timid hay’adda diblomaasiyadda dalka.
Khilaafka ayaa soo baxay bishii Sebtembar ee sanadkii hore, kaddib markii safaaradda Soomaaliya ee Tanzania ay soo saartay bayaan ay ku dhaliilayso booqasho uu safiirka Soomaaliya ee Kenya ku tagay magaalada Kinshasa ee Jamhuuriyadda Dimuqraadiga ah ee Congo.
Safaaradda Tanzania ayaa booqashadaas ku tilmaantay mid ka hor imaanaysa xeerarka diblomaasiyadda Soomaaliya isla markaana faragelin ku ah waajibaadkeeda. Hase yeeshee, safaaradda Kenya ayaa difaacday booqashada, iyada oo sheegtay in ujeeddadeedu ahayd xoojinta xiriirka ganacsi si ay uga faa’iidaystaan ganacsatada Soomaaliyeed.
Wasiiru Dowlaha Arrimaha Dibadda, Cali Cumar oo inta badan loo yaqaan Cali Balcad, ayaa dadweynaha u xaqiijiyay in arrinta la xalliyay.
“Arrinta waa la xalliyay. Wasaaradda Arrimaha Dibadda waxay magacowday guddi latalin ah oo ka kooban safiirro hore si ay u baaraan arrinta. Labada safiir waa loo yeeray, waxayna la kulmeen guddiga, kaddibna guddigu wuxuu soo saaray talooyin,” ayuu Cali Balcad ku sheegay wareysi uu siiyay Mizan Podcast.
Wuxuu dhacdadaas ku tilmaamay mid “nasiib-darro ah,” balse wuxuu intaas ku daray in casharro laga bartay, isla markaana uu rajaynayo in aanay mar kale dhicin. “Waxay ahayd nasiib-darro in qaladkaasi dhaco, balse waan ka barannay. Waxaan rajaynaynaa inaanay mar kale dhicin,” ayuu yiri wasiirku.
Cali Balcad wuxuu qirtay inay jireen gaabisyo la xiriira tababarka iyo awaamiirta gudaha ee adeegga diblomaasiyadda, balse wuxuu ballanqaaday in la qaadi doono tallaabooyin wax ku ool ah si looga hortago khilaafaad la mid ah mustaqbalka.