Madaxweynaha Somaliland ayaa toddobaadkan ka qayb galay Madasha Dhaqaalaha Adduunka (World Economic Forum) si uu u raadiyo aqoonsi caalami ah isla markaana u soo bandhigo fursado maalgashi oo ka jira gobolkiisa gooni-isu-taagga ah.
Casho albaabadu u xirnaayeen oo ka dhinac dhacday shirka Madasha Dhaqaalaha Adduunka, Madaxweynaha Somaliland Cabdiraxmaan Maxamed Cabdullaahi ayaa faahfaahiyay fursadaha maalgashi ee Somaliland, gaar ahaan dekedda istaraatiijiga ah ee Berbera oo ku taalla marin badeed ka mid ah kuwa ugu mashquulka badan adduunka, sida ay sheegeen laba qof oo kulanka goob joog ka ahaa.
Kulanka waxaa ka qayb galay Eric Trump, oo ah wiilka madaxweynaha Mareykanka Donald Trump kana mid ah hoggaamiyeyaasha ganacsiga qoyska Trump oo ku fidsan ganacsiyo kala duwan sida hantida maguurtada ah iyo crypto, iyo sidoo kale madaxweynaha Israa’iil Isaac Herzog, oo dalkiisu uu bishii hore aqoonsaday Somaliland, taas oo ka dhigtay dalkii ugu horreeyay ee ka tirsan Qaramada Midoobay ee sidaas sameeya.
Weriyaha Reuters ayaa arkay Cabdiraxmaan Maxamed Cabdullaahi oo galay qolka shirka halkaas oo ay joogeen Eric Trump iyo Isaac Herzog, sidoo kale wuxuu arkay sawirro muujinaya Eric Trump oo gacan qaadaya madaxweynaha Somaliland kana qaadanaya sawirro.
Intii ay cashadu socotay, Madaxweynaha Somaliland ayaa istaagay isagoo makarafoon gacanta ku haya kana jeediyay hadal kooban, sida ay sheegeen labada qof oo goob joogga ahaa iyo muuqaal hadalkiisa ah oo ay Reuters daawatay.
“24 sano Somaliland waxay ahayd mid xasilloon, dimuqraadi ah, nabad ah, diyaarna u ah ganacsi,” ayuu madaxweynuhu u sheegay ka-qaybgalayaasha. “Waxaan rajaynaynaa in qof kasta oo miiskan ku xeeran uu taageeri doono aqoonsiga Somaliland.”
Madaxweynaha Somaliland iyo Eric Trump ayaa sidoo kale yeeshay laba wada-hadal oo gaagaaban xilliyadii ay is gacan qaadayeen bilowga iyo dhammaadka kulanka, sida ay sheegeen dadka goob joogga ahaa.
Khamiistii, Madaxweynaha Somaliland ayaa xaqiijiyay inuu la hadlay Eric Trump iyo Isaac Herzog, isagoo Reuters u sheegay: “Kulanku si wanaagsan ayuu u dhacay, aad ayuu u fiicnaa.”
Hay’adda wararka Reuters ma aysan awoodin inay si madax-bannaan u xaqiijiso faahfaahinta wada-hadalladii u dhexeeyay Eric Trump iyo Madaxweynaha Somaliland.
Af-hayeen u hadlay Eric Trump ayaa xaqiijiyay in Cabdiraxmaan Maxamed Cabdullaahi uu ka qayb galay cashada isla markaana uu sawir la galay wiilka madaxweynaha Mareykanka, balse wuxuu beeniyay in labada nin ay yeesheen kulan gaar ah, isagoo sheegay in in ka badan 100 qof ay qolka joogeen. “Marna Eric Trump kulan lama uusan yeelan madaxweynaha Somaliland, mana uusan ka hadlin deked,” ayay tiri Kimberly Benza oo bayaan soo saartay.
Benza waxay sheegtay in Eric Trump uusan ka falcelin ama ka hadlin khudbaddii madaxweynaha Somaliland. Markii wax laga weydiiyay wada hadallada gaagaaban, waxay tiri: “Salaan iyo is-xushmad kaliya ayaa la is weydaarsaday, wax kale ma jirin.”
Qoraal uu ku daabacay barta X, kaas oo uusan ku xusin Eric Trump, ayuu Isaac Herzog ku sheegay inuu ku faraxsanaa la-kulanka dhiggiisa Somaliland intii uu joogay goobta dalxiiska ee Switzerland.
Intii lagu jiray xilkii ugu horreeyay ee Madaxweyne Donald Trump, qoyska Trump waxay lahaayeen xeerar anshaxeed oo ay is-saareen kuwaas oo ka mamnuucayay inay ganacsi cusub ka raadsadaan meel ka baxsan Mareykanka. Si kastaba ha ahaatee, maalmo ka hor caleema saarkiisa labaad, shirkadda Trump Organization ayaa soo saartay xeerar cusub oo meesha ka saaray xayiraaddaas.
Aqalka Cad kama uusan jawaabin codsi loo diray oo lagu dalbanayay faallo.
Halkan guji oo daalaco warka aan soo xiganay