Wasiirka Arrimaha Dibadda ee Jamhuuriyadda Islaamiga ah ee Iiraan, Abbas Araqchi, ayaa wada hadal dhanka taleefanka ah la yeeshay Wasiirka Arrimaha Dibadda ee Jamhuuriyadda Azerbaijan, Jeyhun Bayramov. Sida lagu sheegay warbixinno la daabacay, dowladda Baku ayaa si cad u shaacisay in “dhulka iyo hawada Azerbaijan aan marnaba loo oggolaan doonin in loo adeegsado wax kasta oo ka dhan ah Iiraan.”
Wakaaladda Wararka Tasnim ayaa werisay in wicitaanka taleefanka uu dhacay xalay, islamarkaana Wasiir Bayramov uu mar kale si adag u xaqiijiyay in Azerbaijan aysan waligeed oggolaan doonin in dal kale uu hawadeeda ama dhulkeeda u adeegsado fulinta howlgallo milatari oo ka dhan ah Jamhuuriyadda Islaamiga ah ee Iiraan ama dalalka kale ee deriska la ah.
Wasiirka Arrimaha Dibadda ee Azerbaijan ayaa sidoo kale muujiyay walaac ku saabsan xaaladha ugu dambeeyay ee ka socda gobolka, isagoo ugu baaqay dhammaan dhinacyada inay is xakameeyaan, kana fogaadaan falal ama hadallo keeni kara sii hurinta xiisadaha.
Dhankiisa, Wasiir Araqchi ayaa ka digay halista ka dhalan karta faragelinta wax burburisa ee Mareykanka iyo Israa’iil, isagoo carrabka ku adkeeyay mas’uuliyadda wadajirka ah ee saaran dalalka gobolka si looga hortago khataraha ku wajahan nabadda iyo xasilloonida, isla markaana looga hortago in dhulkooda si khaldan ay u adeegsadaan dhinacyo saddexaad.
Wasaaradda Arrimaha Dibadda ee Iiraan ayaa sheegtay in wada hadalka taleefanka uu sidoo kale adkeeyay go’aanka wadajirka ah ee labada dal ee lagu xoojinayo xiriirka laba geesoodka ah, isla markaana lagu ballaarinayo iskaashiga heer gobol iyo mid caalami ah.