Machadka Abaalmarinta Nobel ee Norway ayaa sheegay in Abaalmarinta Nabadda aan la wareejin karin, kaddib hadal ay jeedisay hoggaamiyaha mucaaradka Venezuela Maria Corina Machado, oo soo jeedisay inay abaalmarinteeda 2025 u gudbin karto Madaxweynaha Maraykanka Donald Trump.
“Xaqiiqooyinka waa cad yihiin oo si fiican ayay u sugnaadeen. Marka Abaalmarinta Nobel la shaaciyo, lama laali karo, lama wadaagi karo, mana loo wareejin karo cid kale. Go’aanka waa kama dambeys, wuxuuna ahaanayaa mid taagan mar walba,” ayuu Machadku sheegay Jimcihii.
Abaalmarinta ayaa la siiyay Machado dadaalladeeda ku aaddanaa difaaca xuquuqda dimuqraadiyadda iyo kor u qaadidda kala-guur nabadeed oo laga guurayo xukun kali-talis ah loona guurayo dimuqraadiyad gudaha Venezuela.
Machado ayaa Isniintii, wareysi ay siisay Fox News, ku sheegtay in ku wareejinta abaalmarinta Trump ay noqon karto muujin mahadnaq ah, oo ka timid dadka Venezuela, sababo la xiriira howlgalkii Maraykanku ka fuliyay dalkooda.
Maraykanka ayaa 3-dii Janaayo fuliyay howlgal militari oo lagu qabtay Madaxweynaha Venezuela Nicolas Maduro iyo xaaskiisa.
“Waan maqlay inay doonayso inay sidaas sameyso. Taasi waxay noqon lahayd sharaf weyn,” ayuu Trump ku jawaabay markii la weydiiyay inuu aqbali lahaa abaalmarinta haddii ay iyadu u gudbiso.