HNN: Ugu yaraan afar qof ayaa ku dhintay magaalada Baqdaad kadib weerarro is xigxigay oo u dhexeeyay ciidamada Maraykanka iyo kooxo hubeysan oo Iran taageerto. Qaraxyo xooggan ayaa gilgilay caasimadda Ciraaq, iyadoo weerar cirka ah lagu qaaday dhisme ay isticmaalaan kooxahaas, halka diyaarado aan duuliye lahayn (drone) ay beegsadeen safaaradda Maraykanka.
Weerarkan dhimashada sababay ayaa ka dhacay degmada Jadiriya, waxaana ka horreeyay qarax kale oo laga maqlay meel u dhow xarunta safaaradda Maraykanka ee ku taalla aagga aadka loo ilaaliyo ee loo yaqaan Green Zone. Goobtan ayaa ah xarunta ugu muhiimsan ee hay’adaha dowladda iyo safaaradaha shisheeye ee Baqdaad.
Muuqaallo iyo sawirro la xaqiijiyay ayaa muujinaya dab iyo qiiq ka kacaya agagaarka safaaradda Maraykanka. Muuqaallo kale ayaa sidoo kale tusaya nidaamyada difaaca cirka oo tooganaya diyaarado drone ah oo dul heehaabaya aagga safaaradda.
Wararka ayaa sheegaya in nidaamka difaaca ee C-RAM ee safaaradda uu soo riday ugu yaraan laba drone saacadihii hore ee subaxda, halka mid saddexaad uu ku dhacay gudaha xarunta safaaradda. Goobjoogayaal ayaa sheegay in dabka iyo qiiqa la arkayay ay ka imanayeen gudaha xarunta.
Dhacdadan ayaa muujinaysa sida ay sii kordhayaan weerarrada iyo iska horimaadyada ka dhacaya Ciraaq, gaar ahaan Baqdaad, iyadoo xiisadda u dhexeysa Maraykanka iyo kooxaha Iran taageerto ay sii xoogaysanayso. Waxaa sidoo kale jirta cabsi laga qabo in colaaddan ay sii fido oo ay saameyn ballaaran ku yeelato gobolka oo dhan.
Heemaal News Network