Baarlamaanka Carabta ayaa si cad u muujiyay mowqif adag oo ku aaddan ilaalinta madax-bannaanida, midnimada dhuleed iyo wadajirka Jamhuuriyadda Federaalka Soomaaliya, isaga oo adkeeyay in aan la aqbali karin faragelin shisheeye ama tallaabo kasta oo dhaawacaysa midnimada dalka.
Go’aankan waxa uu si gaar ah ugu soo beegmay xilli bishii December ay Israa’iil sheegtay hadal muran dhaliyay oo la xiriiray arrinta Somaliland, kaas oo Baarlamaanka Carabta u arkay mid khatar ku ah xasilloonida gobolka, isla markaana si toos ah uga hor imaanaya qawaaniinta caalamiga ah iyo mabda’a ixtiraamka midnimada dalalka.
Baarlamaanka Carabta ayaa si cad u xaqiijiyay in Somaliland ay tahay qayb ka mid ah dhulka Jamhuuriyadda Federaalka Soomaaliya, isla markaana aysan jirin cid xaq u leh inay go’aan ka gaarto masiirka ama xaaladda sharci ee qayb ka mid ah dhulka Soomaaliya iyada oo aan loo marin dowladda federaalka ah ee sharciyadda ku dhisan.
Baarlamaanka ayaa cambaareeyay hadal kasta ama tallaabo kasta oo lagu wiiqayo wadajirka Soomaaliya, isagoo ku adkeeyay in aqoonsi ama garab-istaag loo fidiyo gooni-u-goosad kasta uu yahay faragelin toos ah oo ka dhan ah madax-bannaanida dal, isla markaana abuuri kara xasarado siyaasadeed iyo amni oo saameyn ku yeesha guud ahaan Geeska Afrika iyo dunida Carabta.
Sidoo kale, Baarlamaanka Carabta wuxuu ku baaqay in beesha caalamka ay si buuxda u ixtiraamaan midnimada Jamhuuriyadda Federaalka Soomaaliya, una hoggaansamaan qaraarrada Qaramada Midoobay iyo ururrada caalamiga ah ee xaqiijinaya in Soomaaliya tahay dal mideysan oo leh xuduudo aan la kala goyn karin.
Ugu dambayn, Baarlamaanka Carabta wuxuu ku dhawaaqay in uu qaadi doono tallaabooyin siyaasadeed oo heer gobol iyo heer caalami ah, si looga hortago faragelin kasta oo shisheeye, loona difaaco midnimada, madax-bannaanida iyo danaha Jamhuuriyadda Federaalka Soomaaliya, isaga oo adkeeyay in xal kasta oo waara uu ku iman karo oo keliya ixtiraamka wadajirka dhuleed iyo rabitaanka shacabka Soomaaliyeed.