Madaxweynaha Masar Cabdifataax Al-Sisi ayaa Arbacadii magaalada Qaahira kula kulmay Masad Boulos, oo ah la-taliyaha sare ee Madaxweynaha Mareykanka Donald Trump ee arrimaha Carabta iyo Afrika, si ay uga wada hadlaan xaaladda Suudaan iyo arrimo kale oo ku saabsan gobolka.
Kulanka waxaa goob-joog ka ahaa Wasiirka Arrimaha Dibadda Masar Badr Abdelatty, Madaxa Sirdoonka Xasan Rashad, iyo Evgenia Sidrias oo ah ku-xigeenka madaxa safaaradda Mareykanka ee Qaahira, sida lagu sheegay bayaan ka soo baxay madaxtooyada Masar.
Wadahadalladu waxay diiradda saareen xaaladda Suudaan, iyadoo Al-Sisi uu mar kale xaqiijiyay taageerada Masar ee dhammaan dadaallada goboleed iyo kuwa caalami ah ee lagu doonayo in lagu soo celiyo amniga iyo xasilloonida dalkaas.
Waxa uu carrabka ku adkeeyay mowqifka adag ee Masar ee taageeraya madaxbannaanida, midnimada iyo dhulka Suudaan, isla markaana uu si cad u diiday isku day kasta oo wax u dhimaya amniga ama xasilloonida Suudaan.
Al-Sisi wuxuu xusay waxa uu ku tilmaamay “xiriirka dabiiciga ah” ee ka dhexeeya amniga qaranka Masar iyo kan Suudaan, isagoo adkeeyay in Masar aysan oggolaan doonin in khatar kasta oo Suudaan ku timaadda ay waxyeello u keento xasilloonida gobolka.
Masar iyo Mareykanka labaduba waa xubno ka tirsan kooxda loo yaqaan Quad, oo ay sidoo kale xubno ka yihiin Sacuudi Carabiya iyo Imaaraadka Carabta, kuwaas oo isku dubbarida dadaallada caalamiga ah ee lagu doonayo in lagu soo afjaro colaadda Suudaan laguna taageero dib u soo noqoshada nabadda iyo xasilloonida.