Golaha koonfurta Yemen ee STC Oo la Kala Diray

Golaha koonfurta Yemen ee STC , oo labo toddobaad ka hor gacanta ku hayay in ka badan kala bar dalka Yemen, ayaa maanta la kala diray, kadib markii hoggaamiyihii STC , Cayduruus Al-Zubaydi uu ka baxsaday Yemen, isla markaana Sacuudiga oo taageerraya dawladda la aqoonsanyahay ay qabsadeen dhulkii ay STC gacanta ku heysay.

Maxay tani ka dhigantahay?

Kala dirista Golaha Koonfurta Yemen (STC) iyo baxsashada hoggaamiyihii STC, Cayduruus Al‑Zubaydi waxay calaamad u tahay jab istaraatiiji ah oo ku yimid mashruucii Imaaraadka Carabta ee Koonfurta Yemen.

Muddo sanado ah, Imaaraadka Carabta wuxuu STC u arkayay qalab istaraatiiji ah; ciidan dhulka maamula, dekedaha iyo marin-biyoodka gacanta ku haya (Cadan, Mukalla, Bab al-Mandab), isla markaana xakameeya saamaynta Sacuudiga iyo dawladda rasmiga ah ee Yemen. Maalgashigan wuxuu ku dhisnaa hub, tababar, dhaqaale iyo sharciyeyn siyaasadeed.

Hadda maxaa is beddelay?

Kala dirista STC waxay muujinaysaa in Imaaraadku ku guuldareystay inuu dhiso hay’ad maxalli ah oo waarta, leh taageero bulsho iyo hoggaan adkaysi leh. Taasi waxay dhaawacaysaa sumcadda Imaaraadka ee ah sameeye awood maxalli ah.

Baxsashada Al-Zubaydi waxay ku qasbeysaa Imaaraadka inuu dib u qiimeeyo istaraatiijiyaddiisa Yemen laga yaabee inuu u wareego saameyn dadban (dhaqaale, ganacsi, dekedo) halkii uu ka sii wadi lahaa ku tiirsanaanta maleeshiyaad.

Xaaladan, waxay si toos ah u xoojinaysaa mowqifka Sacuudi Carabiya, oo muddo ka soo horjeeday kala go’ Yemen ah, isla markaana u arkayay STC caqabad ku ah midnimada Yemen iyo istaraatiijiyaddiisa gobolka. Halkan Sacuudiga wuxuu ka helayaa fursad uu dib ugu qaabeeyo amniga xaduudaha, gacan ku dhigista dekeddo iyo biyo istaraatiji ah.

Ugu dambeyntii, burburka ku yimid STC ma aha oo keliya dhacdo ku kooban Yemen; waa digniin istaraatiiji ah oo muujinaysa halista ku jirta ku tiirsanaanta wakiillo hubeysan. Imaaraadku weli wuxuu haystaa dhaqaale iyo saameyn goboleed, balse Yemen gudaheeda, mashruucii STC wuxuu u muuqdaa mid fashilmay, taasoo dib u qori karta khariidadda awoodda Koonfurta Yemen iyo loollanka Sacuudi iyo Imaaraad ee Geeska Carabta.