Hugaamiyii STC Yaman Oo Uu Baxsaday Imaaraadka Carabta Isaga Oo Sii Maray Berbera Iyo Muqdisho.

Hoggaamiyaha gooni u goosadka ah ayaa dooni uga raacay Cadan kuna tagay Berbera, kadibna wuxuu diyaarad ka raacay halkaas oo u duushay Abu Dhabi, iyadoo sii martay Muqdisho, sida uu sheegay isbahaysigu.

Isbahaysiga ay Sacuudiga hoggaamiso ee Yemen ayaa ku dhawaaqay in hoggaamiyaha STC uu u baxsaday Imaaraadka Carabta kaddib markii uu ka baaqday wadahadallo nabadeed oo lagu waday Riyadh.

War-saxaafadeedka isbahaysigu soo saaray ayaa lagu sheegay in Aidarous al-Zubaidi uu  baxsaday saqdii dhexe ee habeenkii  Arbacadii, isaga oo saaran markab ka baxay magaalada Cadan ee Yemen kuna wajahan dekedda Berbera ee Somaliland.

Al-Zubaidi ayaa markaas diyaarad la raacay saraakiil ka socday Imaaraadka Carabta, taas oo u duushay caasimadda Soomaaliya ee Muqdisho. War-saxaafadeedku wuxuu intaas ku daray: “Diyaaraddu waxay demiysay nidaamyadeeda aqoonsiga iyadoo dul maraysa Gacanka Cumaan, kadibna waxay dib u shidday toban daqiiqo kahor inta aysan ka degin garoonka milatari ee Al Reef ee Abu Dhabi.”

Ma jirto wax faallo  degdeg ah oo ka yimid STC ama Imaaraadka Carabta.

Haddii arrintan la xaqiijiyo, waxay sii xoojin kartaa khilaafka u dhexeeya Sacuudiga iyo Imaaraadka Carabta, kaas oo soo ifbaxay kaddib markii STC oo ay taageerto Abu Dhabi ay bishii Diseembar weerar ku qaadday ciidammada dowladda Yemen ee ay taageerto Riyadh.

STC  oo markii hore taageeraysay dowladda Yemen ee caalamku aqoonsan yahay dagaalka ay kula jirtay fallaagada Xuutiyiinta ee waqooyiga Yemen, ayaa hadda waxay doonaysaa in la sameeyo dowlad madax-bannaan oo ka hanaqaadda koonfurta Yemen. Waxay la wareegtay gobollada Hadramout iyo Mahra, kuwaas oo xuduud la leh Sacuudiga, arrin ay Riyadh ku tilmaantay “khad cas” oo khatar ku ah amniga qarankeeda.

Isbahaysiga Sacuudiga hoggaamiyo ayaa ka jawaabay arrintaas duqeymo cirka ah oo uu ku qaaday dekedda Mukalla ee Yemen 30-kii Diseembar, isagoo bartilmaameedsaday waxa uu ku tilmaamay shixnad hub ah oo lala xiriirinayo Imaaraadka, isla markaana taageeray baaq ay dowladda Yemen ka dalbatay in ciidammada Imaaraadka ay dalka ka baxaan.

Dhankeeda, Abu Dhabi waxay beenisay in shixnaddaasi hubka ah ay siday, waxayna muujisay ballanqaad ay ku ilaalinayso amniga Sacuudiga. Isla maalintaas, waxay ku dhawaaqday inay soo afjarayso waxa ay ugu yeertay “hawlgalkii la-dagaallanka argagixisada” ee Yemen.

Ciidammada dowladda Yemen, oo ay taageerayaan duqeymaha cirka ee Sacuudiga, ayaa dib ula wareegay Hadramout iyo Mahra, halka STC ay Sabtidii sheegtay inay ka qayb-galayso wadahadallada nabadeed ee Sacuudigu martigelinayo.

Si kastaba ha ahaatee, al-Zubaidi kama mid ahayn rakaabka diyaarada Yemenia Air ee Arbacadii qaaday wafdiga STC una qaaday Riyadh, sida uu sheegay isbahaysigu.

Dhanka kale, madaxa Golaha Hoggaanka Madaxweynaha ee dowladda Yemen ee caalamku aqoonsan yahay, Rashad al-Alimi, ayaa ku dhawaaqay in al-Zubaidi laga saaray golaha, isaga oo ku eedeeyay “khiyaano qaran oo culus”.

Al-Alimi wuxuu sheegay inuu ka codsaday Xeer-ilaaliyaha Guud ee dalka inuu bilaabo baaritaan ka dhan ah al-Zubaidi isla markaana tallaabo sharci ah laga qaado.