HS: Wargayska caanka ah ee Sport ee dalka Spain ayaa si weyn u falanqeeyay xaaladda weeraryahanka da’da yar ee reer Masar, Hamza Abdelkarim, oo loo arko mid ka mid ah xiddigaha ugu mustaqbalka dhow ee akadeemiyada Barcelona (La Masia) xilli ciyaareedkan. Hamza ayaa taariikh dhigay isagoo noqday ciyaaryahankii ugu horreeyay ee reer Masar ah ee u ciyaara kooxda weyn ee reer Catalonia.
Hamza ma ahan ciyaaryahan caadi ah, ee waa weeraryahan dabiici ah oo No. 9 ah, kaas oo dhererkiisu ka badan yahay 1.90 mitir. Wargayska ayaa xusay in booskan uu yahay mid dhif iyo naadir ku ah nidaamka La Masia, taas oo ka dhigtay in indhaha oo dhan lagu soo jeediyo tan iyo markii uu yimid. In kasta oo uu khibrad hore u lahaa kooxda Al Ahly ee dalka Masar, haddana wuxuu u baahday waqti uu kula qabsado nolosha Yurub, isagoo markii dambena saftay kulankiisii ugu horreeyay 8-dii Maarso ka dib markii uu dhammaystirtay arrimo dhanka sharciga ah.
Bilowgiisii wuxuu ahaa mid cajiib ah, isagoo kulankiisii ugu horreeyay ee uu ka hor yimid kooxda Huesca wuxuu dhaliyay gool, isla markaana keenay rigoore ganaax ah. Si kastaba ha ahaatee, kulamadii xigay ma uusan sii wadid qaab ciyaareedkii heerka sare ahaa, wuxuuna ciyaaray kaliya 30 daqiiqo kulankii ay guuldarradu kasoo gaartay kooxda Dam 21-kii Maarso.
Waxa yaabka dhaliyay waxay ahayd markii laga waayay liiska kooxda ee kulankii u dambeeyay, balse wargayska Sport ayaa caddeeyay in maqnaanshihiisa ay sabab u ahayd dhaawac yar oo dhanka muruqa ah. Hamza ayaa lagu arkay tarabuunka isagoo daawanaya ciyaartoyda ay isku kooxda yihiin, waxaana la filayaa inuu garoomada dib ugu soo laabto muddo hal ilaa labo toddobaad gudahood ah. Maamulka Barcelona ayaa wali aaminsan inuu yahay mashruuc weyn oo mustaqbal ku leh kooxda koowaad haddii uu sii wado koritaankiisa jireed iyo midka farsamo.
Heemaal Sport
