Madaxweynaha Brazil, Luiz Inacio Lula da Silva, ayaa diiday (veto) sharci lagu doonayay in lagu yareeyo xukunka xabsi ee 27 sano ah ee loo riday ninkii isaga ka horreeyay ee midigta fog, Jair Bolsonaro, kaas oo lagu helay dambi ah inuu qorsheeyay afgambi.
Bishii Diseembar, Baarlamaanka Brazil oo ay mucaaradku gacanta ku hayaan ayaa u codeeyay sharci hoos u dhigi lahaa xukunka Bolsonaro. Khamiistii, Lula ayaa fuliyay ballanqaadkiisii ahaa inuu hor istaagi doono sharcigaas.
“Iyada oo loo eegaayo mustaqbalka, xaq uma lihin inaan illoowno wixii dhacay,” ayuu Lula ku qoray qoraallo taxane ah oo uu ku daabacay baraha bulshada, isaga oo sheegay in sharcigu uu faa’iido u yeelan lahaa “kuwa weeraray dimuqraadiyadda Brazil.”
Go’aanka diidmada ah ayaa ku soo beegmay sannad-guuradii saddexaad ee weerarkii 2023 lagu qaaday Fagaaraha Saddexda Awoodood ee caasimadda Brasil, halkaas oo ay ku yaallaan dhismayaasha madaxweynaha, Baarlamaanka, iyo Maxkamadda Sare.
8-dii Janaayo ee sannadkaas, kumannaan taageerayaal u ah Bolsonaro, ayaa xoog ku galay dhismayaasha, iyagoo u muuqday inay doonayeen inay doonaayey faragelin milatari oo Lula looga tuurayo talada.
Iyadoo la xusayo sannad-guurada weerarka, Lula ayaa ugu baaqay dadka reer Brazil inay difaacaan dimuqraadiyaddooda da’da yar, taas oo bilaabatay kaddib xukun kalitalisnimo oo rabshado watay uu dhamaaday dabayaaqadii qarnigii 20aad.
“8-da Janaayo taariikhda waxaa lagu xusuusan doonaa inay tahay maalintii guusha dimuqraadiyadda. Waa guul laga gaaray kuwii isku dayay inay awoodda ku qabsadaan xoog, iyagoo iska indhatiraya rabitaanka shacabka ee lagu muujiyay sanduuqa codbixinta. Guul laga gaaray kuwii mar walba difaacay kalitalisnimo, jirdil, iyo ciribtirka mucaaradka,” ayuu Lula ku qoray internetka.
“Isku daygii afgambiga ee 8-dii Janaayo 2023 wuxuu ina xusuusiyay in dimuqraadiyaddu aysan ahayn wax si buuxda oo aan marna lumaayn loo xaqiijiyay.”
Have any thoughts?
Share your reaction or leave a quick response — we’d love to hear what you think!
-
0
-
0
-
0
-
0
-
0
-
0