Madaxweynaha Shiinaha Xi Jinping ayaa maanta sheegay in Shiinaha iyo Hindiya ay yihiin deris wanaagsan, saaxiibo iyo bah-wadaag, isagoo farriin hambalyo ah u diray Madaxweynaha Hindiya Droupadi Murmu munaasabadda Maalinta Jamhuuriyadda ee dalkaas.
Xi Jinping ayaa sheegay in sanadkii la soo dhaafay xiriirka labada dal uu sii wanaagsanaaday, isla markaana uu muhiim u yahay xasilloonida, nabadda iyo barwaaqada caalamka.
Hadalkan ayaa imanaya xilli Shiinaha iyo Hindiya ay dib u hagaajinayaan xiriirkooda kadib xiisaddii xuduudda 2020, taas oo sababtay in Hindiya ay xayiraado saarto qaar ka mid ah shirkadaha iyo maalgashiga Shiinaha, inkastoo ganacsiga labada dal uu weli sare marayo.
Sidoo kale, arrintan waxay ku soo beegmaysaa xilli uu socdo dagaalka canshuuraha Mareykanka, oo saameyn ku yeeshay ganacsiga caalamka, iyadoo badeecadaha Hindiya lagu soo rogay canshuur sare, halka Shiinahana uu wajahayo canshuuro culus.