Dawladda Maraykanka ayaa xaqiijisay inay weerar ka fulisay waqooyi-galbeed dalka Suuriya, kaas oo lagu dilay hoggaamiye sare oo ka tirsanaa ururka Al-Qaacida, kaasoo lagu eedeeyay inuu door ku lahaa dhimashada askar Maraykan ah.
Taliska Dhexe ee Ciidamada Maraykanka (CENTCOM) ayaa sheegay in weerarka, oo dhacay Jimcihii la soo dhaafay, lagu dilay Bilal Hassan al-Jassim, oo ahaa hoggaamiye muhiim ah oo Al-Qaacida ka tirsan.
CENTCOM ayaa tilmaantay in Bilal Hassan al-Jassim uu mas’uul ka ahaa dilka saddex askari oo Maraykan ah, isla markaana uu lahaa “xiriir toos ah” oo uu la lahaa kooxda ISIS.
Sida lagu sheegay warbixinta, xiriirka hoggaamiyahan uu la lahaa ISIS ayaa sababay weerarro lagu dilay laguna dhaawacay askar Maraykan ah iyo sidoo kale dad rayid ah oo u dhashay dalka Suuriya.
Maraykanka ayaa sheegay in howlgalkaasi uu qeyb ka yahay dadaallada lagu ciribtirayo kooxaha argagixisada ah ee halista ku ah ammaanka gobolka iyo kan caalamkaba.