Madaxweynaha Guddiga Midowga Yurub iyo Golaha Midowga Yurub ayaa Sabtidii ka digay in qorshaha Madaxweynaha Maraykanka Donald Trump ee canshuuraha lagu soo rogo wadamada Yurub ee taageeri waaya rabitaanka Maraykanka ee Greenland uu “wiiqi karo xiriirka labada dhinac ee Badweynta Atlaantik.”
“Madaxbannaanida dhuleed iyo madax-bannaanida waa mabaadi’ aasaasi ah oo ka tirsan sharciga caalamiga ah. Waxay muhiim u yihiin Yurub iyo bulshada caalamka guud ahaan,” ayay ku sheegeen Antonio Costa, Madaxweynaha Golaha Midowga Yurub, iyo Ursula von der Leyen, Madaxweynaha Guddiga Midowga Yurub, qoraallo gooni-gooni ah oo ay ku daabaceen barta X.
“EU waxay si buuxda u taagan tahay xulafada Denmark iyo dadka Greenland,” ayay tiri von der Leyen iyo Costa, iyagoo xusay in wada-xaajoodku yahay mid lagama maarmaan ah, islamarkaana ay ka go’an tahay in la sii wado habka horey usoo bilaabmay todobaadkii la soo dhaafay ee u dhexeeyay Denmark iyo Maraykanka.
“Canshuuruhu waxay wiiqi doonaan xiriirka labada dhinac ee Badweynta Atlaantik waxayna halis gelin karaan hoos-u-dhac halis ah. Yurub waxay sii ahaan doontaa mid mideysan, is-waafaqsan, isla markaana ka go’an ilaalinta madax-bannaanideeda,” ayay ku dareen.
Trump ayaa horraantii Sabtida sheegay in Washington ay canshuuro cusub ku soo rogi doonto badeecadaha ka imanaya siddeed dal oo Yurub ah laga bilaabo 1-da Febraayo, iyadoo heerarka canshuuraha si weyn u kordhi doonaan bisha Juun, taas oo uu ku sababeeyay “walaac amni qaran” oo la xiriira Greenland.
Greenland, oo ah dhul is-maamula oo ka tirsan Boqortooyada Denmark, ayaa soo jiidatay danaha Maraykanka sababo la xiriira goobteeda istaraatiijiga ah iyo kheyraadkeeda macdanta oo ballaaran, iyo welwel la xiriira dhaqdhaqaaqa sii kordhaya ee Ruushka iyo Shiinaha.
Trump ayaa marar badan sheegay in Maraykanku uu khasab ku yahay inuu la wareego Greenland si loo ilaaliyo ammaanka qaranka, loogana hortago in Ruushka ama Shiinaha ay gacanta ku dhigaan dhulkaas.
Labada dal ee Denmark iyo Greenland ayaa si cad u diiday soo jeedin kasta oo ku saabsan in la iibiyo dhulkaasi, iyagoo mar kale adkeeyay madax-bannaanida Denmark ee jasiiradda.