Jeneraal Elio Manes ayaa maanta si rasmi ah ula wareegay hoggaanka Hawlgalka Tababarka Midowga Yurub ee Soomaaliya (EUTM-S), kadib munaasabad xil-wareejin ah oo ka dhacday xarunta EUTM, halkaas oo uu xilka kala wareegay Jeneraal Sofia Westermark.
Xil-wareejinta ayaa loo fuliyay si waafaqsan habraacyada hawlgalka, iyadoo si gaar ah diiradda loo saaray sii socoshada iyo joogtaynta shaqada EUTM-S, si aysan u istaagin barnaamijyada tababarka iyo taageerada ay bixiso.
Isbeddelkan hoggaamineed ayaa muujinaya ballanqaadka joogtada ah ee Midowga Yurub ee ku aaddan taageeridda hay’adaha amniga Soomaaliya, gaar ahaan dhinacyada tababarka, latalinta iyo dhisidda awoodda ciidamada.
Jeneraal Elio Manes ayaa xilkiisa ku bilaabaya xoojin iyo adkayn barnaamijyada tababarka ee hadda socda, iyo ballaarinta taageero gaar ah oo loo fidinayo bah-wadaagta Soomaaliyeed, si loo kordhiyo awooddooda qorsheynta iyo fulinta hawlgallada amni ee waara.
“Waxaan sharaf weyn u arkaa inaan hoggaamiyo EUTM-S xilli muhiim ah,” ayuu yiri Jeneraal Manes, isagoo xusay in mudnaanta koowaad ay noqon doonto xoojinta iskaashiga lala leeyahay hay’adaha amniga Soomaaliya, si ay si tartiib tartiib ah ula wareegaan hoggaaminta amniga dalkooda.
Hawlgalka EUTM Somalia, oo haatan ku jira mandate-kiisii 9aad, ayaa diiradda saaraya dhismaha Ciidamada Amniga Soomaaliya (SSF) ee hoos yimaada Dowladda Federaalka Soomaaliya, iyadoo la tixgelinayo baahiyaha iyo mudnaanta ay Soomaaliya leedahay. Hawlgalku waxa uu bixiyaa talooyin istiraatiiji ah oo ku wajahan hay’adaha amniga ee ku sugan Muqdisho, iyo sidoo kale tababar iyo latalin ku saabsan dhinaca awood-dhisidda.
EUTM-S ayaa sidoo kale diyaar u ah, marka ay duruufuhu saamaxaan isla markaana uu oggolaado Guddiga Siyaasadda iyo Amniga Midowga Yurub (PSC), in uu ballaariyo hawlihiisa xarumaha gobollada. Intaa waxaa dheer, hawlgalku wuxuu taageero siinayaa hay’adaha kale ee Midowga Yurub iyo kuwa caalamiga ah, si waafaqsan mabaadi’da, qiyamka iyo danaha Midowga Yurub.
Wareeggan cusub ee hoggaamineed ayaa la filayaa inuu xoojin dheeraad ah ku soo kordhiyo dadaallada lagu dhisayo amni waara oo ay hoggaaminayaan hay’adaha Soomaaliyeed.