HNN: Qaraxyo ayaa laga maqlay guud ahaan dalka Iiraan, iyadoo isbitaal ku yaalla magaalada Ahvaz uu waxyeello soo gaartay.
Caasimadda Tehran, gaar ahaan bartamaha magaalada, waxaa laga maqlay dhawaaqyo la xiriira nidaamka difaaca cirka oo la hawlgeliyay. Sidoo kale, qaraxyo waaweyn ayaa laga soo sheegayaa qaybaha bari iyo galbeed ee caasimadda.
Warar kale ayaa sheegaya in qaraxyo ay ka dhaceen magaalooyin badan oo kale, iyadoo Maraykanka iyo Israa’iil ay sii wadaan weerarro cirka ah.
Magaalada Bandar Abbas, xarun raadiyo ayaa la beegsaday, hal qofna waa la dilay. Sidoo kale magaalooyinka Khorramabad iyo Urmia, laba xaafadood oo dad deggan yihiin ayaa la weeraray, taasoo keentay dhimasho dad rayid ah.
Arrintani ma aha mid cusub. Waxaa la xaqiijiyay in 1,500 qof ay dhinteen, waxaana la filayaa in tiradaasi ay sii kororto maadaama weerarradu ay weli socdaan.
Magaalooyinka Isfahan, Karaj iyo Ahvaz sidoo kale waxaa laga maqlay qaraxyo waaweyn. Magaalada Ahvaz, waxaa la sheegayaa in isbitaal uu saameyn ku yeeshay qaraxyada.
Guud ahaan, Ururka Bisha Cas ee Iiraan ayaa sheegay in ka badan 80,000 goobood oo rayid ah la weeraray, qaar badan oo ka mid ahna si buuxda loo burburiyay. Tiradan waxaa ku jira isbitaallo, dugsiyo, jaamacado iyo xarumo ay leedahay Bisha Cas.
Heemaal News Network