Madaxweynaha Suuriya, Axmed Sharac ayaa ku dhawaaqay heshiis ay dawladdu la gashay SDF, kaasoo dhigaya in guud ahaan la kala diro oo meesha laga saaro jiritaanka kooxda Kurdida ee SDF, iyadoo hoggaamiyaha SDF, Mazloum Abdi oo heshiiska la sheegay hab online ah inuu ku saxiixay awoodiisa la baabi’iyay. Waxay dawladda Suuriya , la wareegtay ceelasha shidaalka iyo xuduudaha waqooyiga iyo bariga ee ay ku xoogganayeen SDF.
Qodobbada lagu heshiiyay
1. In la hirgeliyo xabbad-joojin dhammaystiran oo degdeg ah dhammaan jiidaha iyo meelaha ay isku horfadhiyaan ciidanka dowladda Suuriya iyo Ciidanka Dimoqraadiga Suuriya (SDF), iyadoo la socota in dhammaan cutubyada milatari ee SDF dib loogu raro bariga Webiga Yufraad, tallaabo hordhac ah oo dib-u-habayn ah.
2. In si degdeg ah oo buuxda maamulka iyo ammaanka gobollada Dayr-al-Zor iyo Raqqa loogu wareejiyo dowladda Suuriya, lana wareejiyo dhammaan hay’adaha rayidka iyo xarumaha adeegga. Waxaa la soo saari doonaa wareegtooyin xaqiijinaya in shaqaalaha hadda jooga lagu daro wasaaradaha dowladda Suuriya. Dowladda waxay ballanqaadaysaa in aan la beegsan doonin shaqaalaha SDF, dagaalyahannada, iyo maamulka rayidka ee labada gobol.
3. In dhammaan hay’adaha rayidka ee gobolka Hasakah lagu daro hay’adaha iyo qaab-dhismeedka maamulka dowladda Suuriya.
4. In dowladda Suuriya la wareegto dhammaan isgoysyada xuduudaha iyo goobaha shidaalka iyo gaaska, iyadoo ciidamo rasmi ah lagu sugayo si kheyraadka dib loogu celiyo dowladda.
5. In dhammaan ciidamada iyo hay’adaha ammaanka ee SDF si shaqsi-shaqsi ah loogu daro Wasaaradaha Difaaca iyo Arrimaha Gudaha ee Suuriya, kaddib baaritaanno amni, lana siiyo darajooyin ciidan iyo xuquuqdooda dhaqaale iyo saadka, iyadoo la dhowrayo is-maamulka deegaannada Kurdiyiinta.
6. Hoggaanka SDF wuxuu ballanqaadayaa inuusan ku darin xubno ka haray nidaamkii hore, isla markaana uu soo gudbin doono liisaska saraakiisha ka haray nidaamkii hore ee ku sugan waqooyi-bari Suuriya.
7. In la soo saaro wareegto madaxweyne oo lagu magacaabayo guddoomiyaha gobolka Hasakah, si loo xaqiijiyo ka-qaybgal siyaasadeed iyo matalaad maxalli ah.
8. In hubka culus laga qaado magaalada Ayn al-Arab (Kobani), lana sameeyo ciidan amni oo ka kooban dadka deegaanka, isla markaana boolis maxalli ah hoos yimaada Wasaaradda Arrimaha Gudaha la sii hayo.
9. In maamulka xabsiyada iyo xeryaha maxaabiista Daacish (ISIS) iyo ciidamada ilaaliya lagu wareejiyo dowladda Suuriya, si ay u qaaddo mas’uuliyadda sharci iyo amni ee buuxda.
10. In la ansixiyo liiska hoggaamiyeyaasha ay SDF soo magacawday si loo buuxiyo xilalka sare ee milatari, amni iyo rayid ee dowladda dhexe, si loo xaqiijiyo wada-shaqayn qaran.
11. In la soo dhoweeyo Wareegtada Madaxweyne Lr. 13 ee 2026, oo aqoonsanaysa xuquuqda dhaqanka iyo luqadda Kurdiyiinta, isla markaana xal u helaysa dhibaatooyinka sharci iyo madani ee dadka aan diiwaangashnayn iyo soo celinta xuquuqda hantida.
12. In SDF ay ka saarto dhammaan hoggaamiyeyaasha iyo xubnaha ajaanibta ah ee Xisbiga Shaqaalaha Kurdistan (PKK) xuduudaha Suuriya, si loo ilaaliyo madaxbannaanida iyo xasilloonida dalka.
13. In dowladda Suuriya ay sii waddo dagaalka ka dhanka ah argagixisada (ISIS) iyadoo xubin firfircoon ka ah isbahaysiga caalamiga ah, isla markaana la shaqaynaysa Mareykanka si loo xaqiijiyo ammaanka iyo xasilloonida gobolka.
14. In la gaadho is-afgarad ku saabsan soo-noqoshada ammaan iyo sharaf leh ee dadka degaannada Afrin iyo Sheekh Maqsoud.
Madaxweynaha Jamhuuriyadda Carabta Suuriya Ahmed al-Sharaa
Taliyaha Ciidanka Dimoqraadiga Suuriya (SDF) Mazloum Abdi
