Duufaan cusub iyo qabow daran ayaa ku soo wajahan Gaza, iyadoo boqolaal kun oo Falastiiniyiin ah ay ku nool yihiin teendhooyin ku-meel-gaar ah oo jilacsan, guryo burburay iyo hoyo aan ka celin karin roobka, dabaylaha iyo habeenada aadka u qabow.
Xeryaha barakacayaasha intooda badan ma laha wax kaabayaal ah, mana jirto wax ilaalin ah oo carruurta, haweenka iyo waayeelka ka difaaci kara cimilada Xagaaga.
Warbixinno ka soo baxay hay’adaha maxalliga ah ayaa sheegaya in kumannaan teendho ay burbureen ama noqdeen kuwo aan la degi karin, halka qoysas badanna ay ku khasban yihiin inay ku seexdaan dhulka qoyan ama dhismayaal khatar ku ah inay dumo. Xannibaadda Israa’iil ee gargaarka, guryaha diyaarsan, qalabka dhismaha iyo shidaalka ayaa sii adkaysay in dadkaasi helaan wax ay isku diiriyaan ama ku dhistaan hoy ka badbaado roobka iyo qabowga.
Qoysaska barakacayaasha ah ayaa isticmaalaya bacaha caagga ah, maro duug ah iyo qoryo ay ku shitaan dab yar si ay isu diiriyaan, taas oo halis kale ku ah noloshooda. Isbitaallada Gaza ayaa buuxsamay, gaar ahaan carruur qaba xanuunno ka dhashay qabowga iyo nafaqo-xumada. Waxaa sidoo kale kordhay dhimashada dadka u nugul, sida carruurta yaryar, waayeelka iyo dadka xanuunsan.
Xaaladdan bani’aadantinimo ee murugada leh waxay muujinaysaa sida ay nolosha dadka Gaza u sii adkaanayso, iyadoo dagaalka, barakaca, gaajada iyo hadda jiilaalka daran ay isugu darsameen, kana dhigeen maalin walba mid la mid ah halgan nololeed oo adag.