Italy ayaa ka qayb geli doonta hindisaha Aqalka Cad ee loo yaqaan “Board of Peace” iyadoo ah dal kormeer ah (observer), sida ay xaqiijisay Ra’iisul Wasaaraha Giorgia Meloni Axaddii.
Wareysi ay siisay wargeyska Corriere della Sera, Meloni waxay sheegtay in Talyaanigu helay casuumaad kormeer ahaan ah isla markaana ay si togan uga jawaabi doonaan.
“Waxaa naloo casuumay inaan noqono dal kormeer ah, annaguna aragtideenna waa xal wanaagsan marka laga hadlayo dhibaatada dagaalka Bariga Dhexe,” ayay tiri.
Waxay xustay in xayiraado dastuur ah ay ka hor istaagayaan Talyaaniga inuu si rasmi ah xubin uga noqdo hay’adda, balse ay Rome weli taageerayso hindisaha, iyadoo ku tilmaantay Bariga Dhexe “mudnaan koowaad,” taasoo ay muujinayso dadaallada diblomaasiyadeed ee ay Talyaanigu ka wadaan gobolka.
Meloni waxay intaas ku dartay in heerka wakiilnimada Talyaaniga weli aan la go’aamin, maadaama casuumaadaha loo diray dalalka Yurub ay ahaayeen kuwo dhowaan la bixiyay. Waxay tilmaantay in dalal kale oo Yurub ah, gaar ahaan kuwa Mediterranean-ka iyo kuwa juqraafi ahaan u dhow gobolka, ay iyaguna ka qayb qaadan karaan doorka kormeerka.
Hadalladeeda waxay ku soo beegmeen iyadoo ay la tashiyo la sameyneyso hoggaamiyeyaasha Yurub, iyo sidoo kale xiriir ay la lahayd Wasiirka Arrimaha Dibadda Talyaaniga Antonio Tajani, oo ka qayb galayay kulammo ay la yeesheen dalalka Midowga Yurub oo diiradda lagu saarayay Qasa.
22-kii Janaayo, wakiillo ka socday 19 dal ayaa saxiixay Axdiga Board of Peace intii uu socday Madasha Dhaqaalaha Adduunka ee World Economic Forum ee Davos, Switzerland.
Board of Peace waxaa lagu aasaasay qaab-dhismeed ku wajahan dadaallada lagu raadinayo xal nabadeed oo ka hanaqaada Marinka Qasa, iyadoo sidoo kale ujeedadeedu tahay nabadeynta meelo kale oo dunida ah. United States ayaa sheegtay in dalal dheeraad ah ay tan iyo markaas ku biireen hindisaha.
Kulankii ugu horreeyay ayaa loo qorsheeyay 19-ka Febraayo magaalada Washington, DC, heer hoggaamiye.
Warbaahinta Talyaaniga ayaa werisay in Tajani laga yaabo inuu matalo Rome kulanka Washington, inkastoo aan wali go’aan kama dambeys ah la shaacin.
Markay ka hadlaysay xiriirka guud ee u dhexeeya Yurub iyo Mareykanka, Meloni waxay carrabka ku adkaysay muhiimadda iskaashiga labada dhinac, iyadoo ku tilmaantay marxaladda hadda jirta “mid aad u adag,” balse ku dooday in labada dhinac ay xoogga saaraan waxa mideeya halkii ay ka eegilahaayeen kala duwanaanshaha.
Waxay sidoo kale taageertay baaqyada ku aaddan in Yurub ay wax badan ka qabato arrimaha amniga, gaar ahaan tiirka Yurub ee NATO, iyadoo isla markaas ka fogaatay dhaleeceynta siyaasadeed ee loo jeediyo Madaxweynaha Mareykanka Donald Trump iyo dhaqdhaqaaqiisa MAGA (Make America Great Again), iyadoo sheegtay in qiimeynta noocaas ahi ay tahay arrin xisbiyeed, balse aysan quseyn hay’adaha Midowga Yurub.