Afhayeenka Wasaaradda Difaaca Mareykanka, Admiral Zeki Aktürk, ayaa ku dhawaaqay in afar markab oo ka tirsan ciidamada badda ee Turkey ay bilaabi doonaan hawlgal cusub oo ku wajahan xeebaha Somalia, kaas oo la qorsheeyay inuu billowdo 16-ka Maarso.
Markabtan ayaa ka ambabixi doona Bariga badda Mediterranean Sea iyagoo u soo socda dhanka biyaha Soomaaliya si ay uga qayb qaataan howlgal wadajir ah oo dhinaca ammaanka badda ah.
Markabtan dagaalka ah ee la dirayo ayaa kala ah TCG Göksu, TCG Bayraktar, TCG Bartın iyo TCG Yzb. Güngör Durmuş. Sida uu sheegay Admiral Aktürk, hawlgalkan ayaa qayb ka ah howlaha ay wadaan ciidamada badda ee loo yaqaan Türkiye Somalia Naval Task Group, kuwaas oo diiradda saaraya xoojinta iskaashiga dhinaca badda ee u dhexeeya Ankara iyo Muqdisho.
Mas’uuliyiinta Turkiga ayaa tilmaamay in howlgalkaasi uu sidoo kale qayb ka yahay dadaallada lagu xoojinayo ammaanka biyaha Soomaaliya, gaar ahaan xilligan ay sii kordhayaan hawlaha la xiriira sahminta iyo qodista shidaalka ee xeebaha dalka. Dowladda Turkiga ayaa hore u dirtay dhowr markab oo dagaal iyo kuwo ilaalin ah kuwaas oo la socday markab ku howlan sahminta shidaalka ee ku sugan biyaha Soomaaliya.
Wararku waxay sheegayaan in ugu yaraan saddex markab oo kale oo Turkigu leeyahay ay hore ugu sugnaayeen xeebaha Soomaaliya, kuwaas oo qeyb ka ah hawlgalka ilaalinta iyo taageerada howsha sahminta kheyraadka badda. Arrintan ayaa ka dhigeysa in Turkigu uu hadda u diray biyaha Soomaaliya in ka badan toban markab oo isugu jira kuwa dagaal, ilaalin iyo taageero farsamo.
Markabtan cusub marka ay yimaadaan dekedda Mogadishu ayaa la filayaa inay sii wadaan socdaalkooda iyagoo u dhaqaaqi doona dhanka badda cas. Halkaas ayay ka sii wadi doonaan hawlaha ilaalinta amniga badda Soomaaliya iyo marin-biyoodka muhiimka ah, iyadoo la fulinayo heshiis iskaashi oo dhinaca difaaca iyo amniga badda ah oo ay wada galeen dowladaha Soomaaliya iyo Turkiga.
Heshiiskaasi ayaa lagu doonayaa in lagu xoojiyo awoodda difaaca badda ee Soomaaliya, isla markaana lagu sugo badqabka maraakiibta ganacsiga iyo howlaha sahminta kheyraadka dabiiciga ah ee ku jira biyaha dalka. Dowladda Turkiga ayaa muddooyinkii dambe si weyn u kordhisay taageerada ay siiso Soomaaliya, gaar ahaan dhinacyada milatariga, tababarka ciidamada iyo ilaalinta xeebaha.