Maalmaha soo socda waxaa la filayaa in xeebaha Soomaaliya ay soo gaaraan laba markab oo casri ah, kuwaas oo qeyb ka ah howlgal ballaaran oo lagu sahminayo laguna soo saarayo shidaalka iyo gaaska dabiiciga ah ee ku jira badda Soomaaliya. Maraakiibtan ayaa ah kuwo uu dhawaan soo iibsaday dowladda Turkiga, isla markaana leh tiknoolajiyad sare oo u saamaxaysa inay howlgallo qodis iyo sahamin ka sameeyaan biyaha hoostooda (offshore drilling).
Mas’uuliyiin ka tirsan Dowladda Turkiga ayaa xaqiijiyay in maraakiibtan ay si gaar ah ugu talagaleen baaritaanka kheyraadka dabiiciga ah, gaar ahaan shidaalka iyo gaaska ku jira badda Soomaaliya, taasoo muujinaysa muhiimadda istiraatiijiyadeed ee ay Soomaaliya u leedahay Turkiga dhanka tamarta.
Bishii hore, Wasiirka Tamarta iyo Kheyraadka Dabiiciga ah ee Turkiga, Alparslan Bayraktar, ayaa si rasmi ah u shaaciyay in Turkigu qorsheynayo inuu bisha Febraayo ee sannadka soo socda Soomaaliya u soo diro markab weyn oo qodista saliidda iyo gaaska ah, kaas oo magaciisa lagu sheegay “Cagri Bey”. Markabkan ayaa ka mid ah maraakiibta ugu awoodda badan ee Turkigu leeyahay, wuxuuna awood u leeyahay inuu qodis ka sameeyo biyo aad u qoto dheer, kana soo saaro shidaal iyo gaas heer ganacsi ah.
Wasiirka ayaa tilmaamay in hawlgalka markabka Cagri Bey uu si gaar ah diiradda u saari doono aagagga badda Soomaaliya, inkasta oo uusan wali bixin faahfaahin rasmi ah oo ku saabsan inta le’eg ee shidaal ama gaas ah ee la filayo in la helo. Arrintan ayaa ah mid caadi ah, maadaama sahminta hordhaca ah ay qaadato waqti ka hor inta aan la shaacin natiijooyin rasmi ah.
Howlgalkan sahminta iyo qodista shidaalka ayaa yimid kadib markii Soomaaliya iyo Turkiga ay horay u kala saxiixdeen heshiis dhinaca tamarta, sahminta kheyraadka dabiiciga ah iyo iskaashi istiraatiiji ah. Heshiiskan ayaa ujeedkiisu yahay in la horumariyo kheyraadka dabiiciga ah ee Soomaaliya, isla markaana dalka looga faa’iideeyo dhaqaale ahaan, iyadoo la adeegsanayo khibradda iyo awoodda farsamo ee Turkiga.
Guud ahaan, tallaabadan waxaa loo arkaa fursad weyn oo dhaqaale oo u soo hoyan karta Soomaaliya, haddii sahmintu guuleysato, maadaama ay horseedi karto: Kordhinta dakhliga dowladda, Abuurista, shaqooyin cusub, Horumarinta kaabeyaasha dhaqaalaha, Iyo in Soomaaliya ay gasho suuqyada caalamiga ah ee tamarta.