Wasiirka Arrimaha Dibadda Xukuumadda Soomaaliya Axmed Macalin Fiqi ayaa nasiibdarro weyn ku tilmaamay in magaalada Hargeysa looga heeeso qowmiyad katirsan dalka Itoobiya, waxna loogu dhimo midnimada Soomaaliya.
Waxa uu sheegay Wasiirka in heesta laga qaaday Hargeysa lagu sheegay in Somaliland aysan laheyn cadaw uga daran Muqdisho iyo Hargeysa, arrintaas uu ku tilmaamay in ay tahay wax aad looga xumaado.
Wasiir Axmed Fiqi ayaa sidoo kale sheegay in heesta laga qaaday magaalada Hargeysa ay tahay mid lagu marin habaabinayo dhallinyarada Soomaaliyeed, sidoo kale lagu muujinayo damaca qowmiyad Itoobiyaan ah oo cadaawad kala dhaxeyso dadka Soomaaliyeed.
“Dadka Soomaaliyeed hees la sameeyay iyo kalimaad lagu raali-gelinayo dal kale oo shisheeye ,misana damac leh laguma sandulleyn karo dadka Soomaaliyeed,” ayuu yiri wasiirka Axmed Macalin Fiqi.
Heestan laga qaaday munaasabad ka dhacayday magaalada Hargeysa oo lagu xusayay munaasabadda 26ka Juun ayaa carro badan ka abuurtay baraha bulshada, waxaana heestaasi si weyn u dhibsaday dadka Soomaaliyeed oo daafaha dunidda ku kala nool.