Wargeyska ka soo baxa Ingiriiska ee The Telegraph, ayaa isagoo xiganaya sarkaal sare oo Iran ah , wuxuu ku warramay inay Iran ku amartay saraakiisha sare ee ka jooga Yemen inay isaga soo baxaan, si looga fogaado dagaal toos ah oo ay Iran la gasho Mareykanka , haddii ay dhacdo in duqeymaha Mareykanka uu ka geysanayo goobaha ay maamullan Xuutiyiinta lagu dilo saraakiisha Iran.
Haddii uu warkan dhab yahay, markaa Iran waxay ka tagtay Xuutiyiinta, iyadoo mar kale la arki karo kooxdii labaad ee ugu xoogganayd xulafada Iran oo la burburinayo, kaddib wixii la arkay ee ku dhacay ururka Xisbullah oo tobannaan sanno ay maalgelinaysay Iran, balse bilooyin waxay ku qaadatay Israa’iil inay burburiso qaabdhismeedka ururka iyo inay meesha ka saarto hoggaamiyayaashii Xisbullah, halka uu sidan oo kale doonayo Mareykanka inuu ku sameeyo Xuutiyiinta..!
Dhinaca kale Madaxweynaha Iran, Masoud Pezeshkian, ayaa xilli ay sare marayso hanjabada Mareykanka ee ka dhanka ah Iran , wuxuu waxyar ka hor sheegay inay Iran diyaar u tahay wada-hadal iyo wax wada qabsi ku saleysan dano guud iyo is ixtiraam, si xiisadda hoos loogu dhigo.
