Mareykanka iyo Masar Oo ka Wada-hadlaya Heshiiska Xamaas iyo Israa’iil

Xoghayaha Arrimaha Dibedda ee Maraykanka, Antony Blinken, ayaa la kulmaya Madaxweynaha Masar, isaga oo sii wada dadaalkiisa diblumaasiyadeed ee uu ku doonayo in xabbad-joojin iyo heshiis lagu sii daayo la-haysteyaal u dhashay Isra’iil oo lagu haysto Qasa.

Mr Blinken iyo martigeliyaha, Abdel Fattah El-Sisi, ayaa si kooban warbaahinta uga soo muuqday iyagoo ku sugan magaalada El-Alamein ka hor inta aysan wada hadalku billaaban.

Waxaa sidoo kale halkaasi ku sugan madaxa sirdoonka Masar, Cabbaas Kamel, oo si weyn ugu lug lahaa wada xaajoodka Israel iyo Xamaas.

Blinken ayaa sheegay in Israa’iil ay aqbashay waxa uu ugu yeeray “soo jeedin isa soo tareysa”. Waxaa uu Xamaas ku booriyay inay sidaas oo kale sameeyaan, balse ma jirto wax faah faahin ah oo qorshahan la xirriira oo si rasmi ah loo shaaciyay.