Dowladda Mareykanka ayaa cunaqabateyno kusoo rogtay saddex shirkadood oo laga leeyahay dalka Sudan, kuwaa oo lagu eedeeyay in ay ku lug leeyihiin colaada muddo sanadka ku dhaw ka socota dalkaasi.
Shirkadaha Mareykanka cunaqabateynta kusoo rogtay waxaa kamid ah Bankiga Alkhaleej iyo Al-Fakher Advanced Works, waxaana labadan shirkad lagu eedeeyay in ay gacanta ku hayaan ayna taageerayaan ciidamada Gargaarka Degdegga ah (RSF).
Mareykanka ayaa sidoo kale cunaqabateyn saartay shirkadda kale ee Zadna International oo kamid ah shirkadaha waa weyn ee Sudan ka howlgala, shirkadan ayaa iyana lagu eedeeyay in ay taageerto ciidanka milatariga Sudan.
War-saxaafadeed kasoo baxay waaxda maaliyadda ee Maraykanka ayaa lagu sheegay in shirkadahan ay wiiqeen nabadda, amniga, iyo xasilloonnida Suudaan iyagoo lacag dhaqday ama dhaqaale ka soo ururiyay dhoofinta dahabka.
Dalka Sudan waxaa wali ka socda dagaal dhiig badan ku daatay oo u dhaxeeya ciidamada milatariga Sudan iyo kuwa RSF, dagaalkan ayaana sababay dhimashada dad bada iyo barakaca boqolaal kun oo qof .