Heemaal News Network

Maxaa ka jira in Turkigu Boqolaal Askari u soo Dirayo Somalia?

Turkiga ayaa qorsheynaya inuu toddobaadyada soo socda Soomaaliya u diro boqolaal ka tirsan ciidankeeda gaarka ah ee loo yaqaano SADAT ka dib heshiis ay dhawaan galeen laba dowladood saraakiil amaan oo diiday in magacooda xigto ayaa u sheegay warbaahinta qaarkood.

Sadat waa ciidamo si gaar ah u tababaran oo ka shaqeya arrimaha difaaca, sida tababarada, qalabayta, latalinta iyo fulinta howlgaladda gaar ah.

Ciidankaan oo inta badan howlgaladoodu qarsoodi yihiin waxay u xilsaaran yihiin difaaca danaha Turkiga ee dibadda.

Somalia iyo Turkey ayaa dhawaan galay dhowr heshiis oo xogtooda aad loo qariyay.

Ma suurtagalin in la xaqiijiyo tirada ciidanka iyo goobaha ay dagi doonaan iyo mudada ay joogi doonaan balse ilaa 3 ilo wareed oo aan xiganayno waxa ay isku raaceen in ciidankaan sugi doonaan ammaanka goob lagu tijaabin doono gantaallada ridada dheer ee Turkey sidoo kale laga gani doono dayax gamceed.

Dowlada Somalia weli faahfaahin kama bixin arrintan waxay talaabadani ku soo aadeysaa xili Turkiga uu Duleedka Muqdisho ku leeyahay saldhig weyn oo milateri kaasoo uu ku tababaro ciidamada xooogga dalka iyo kuwa booliska gaarka ah.