Hassan Abdul Ghani oo ah sarkaal ka tirsan waaxda hawlgallada milatari ee kooxaha mucaaradka ayaa maanta barta Telegram kaga dhawaaqay in ciidamadiisa ay 20-Km oo kaliya u jiraan magaalada caasimada ah Dimishiq.
“Ciidamadu hadda waxay wax ka yar 20 Kiilomitir u jiraan albaabka koonfureed ee caasimadda Dimishiq.” ayuu yiri Ghani
Abdul Ghani ayaa ku yiri barta Telegram: “Ciidankeena ayaa gudaha u galay magaalada Al-Sanamayn oo dhanka waqooyi ka xigta magaalada Darca, waxaana ay ku dhawaaqeen in ay xoreeyeen. Taas oo macneheedu yahay, waxaan wax ka yar 20 kiilomitir u jirnaa albaabka koonfureed ee caasimadda Dimishiq.”
Ciidanka nidaamka Assad ayaa isaga baxay deegaanka Al-Dumayr iyo saldhigga milatari ee ku yaalla baadiyaha Dimishiq, taa oo ka dhigan inay furantahay waddada dhanka bari ee tagaysa gudaha Dimishiq.
Dhaqdhaqaaqa mucaaradka Suuriya , ayaa baahiyay warsaxaafadeed ay ku sheegayaan inay guda galeen wajiga u dambeeya ee howlgalkooda oo ay isku diyaarinayaan galitaanka magaalada Dimishiq ee caasimadda Suuriya oo ay la wareegeen deegaannada koonfurta ee Dimishiq.
