Ra’iisul Wasaaraha Israa’iil Benjamin Netanyahu ayaa saakay waaberigii ka degay magaalada Budapest ee dalka Hungary.
Waa booqashadiisii ugu horreysay ee uu ku tago dal ka mid ah Midowga Yurub tan iyo sannadkii 2023, iyadoo booqashadiisan ay jebineyso amarkii ay horay u soo saartay Maxkamadda Dambiyada Caalamiga ah (ICC) ee ku aadanaa qabashada iyo xarigga Netanyahu.
Ra’iisul Wasaaraha Hungary, Viktor Orbán ayaa casuumaad rasmi ah u fidiyay Netanyahu bishii Noofambar ee sanadkii hore, iyadoo ay xusid mudan tahay in casuumaadani uu u fidiyay Netanyahu maalin kaddib markii ICC soo saartay amarka qabashada ah ee Netanyahu kaas oo ay sheegtay in loo haysto eedeymo la xiriira dambiyo dagaal oo lagu galay Gaza.
Orbán ayaa sheegay in kastoo dalkiisu uu xubin ka yahay ICC, hadana aysan fulin doonin amarka qabashada ah isagoo ku tilmaamay go’aanka maxkamadda mid laga lahaa ujeeddooyin siyaasadeed.
Hungary ayaa markii dambe ku dhawaaqday inay ka baxday xubin-nimadeedii Maxkamadda Dambiyada Caalamiga ah ee (ICC), sida uu sheegay Madaxa Xafiiska Ra’iisul Wasaaraha Gergely Gulyas oo la hadlay warbaahinta caalamka.
Go’aankan ayaa lagu dhawaaqay wax yar kadib markii hoggaamiyaha Israa’iil Benjamin Netanyahu uu saaka booqasho rasmi ah ku yimid dalka Hungary.