Raysal wasaaraha Xukuumadda Fedaraalka Soomaaliya Xamse Cabdi Barre ayaa maanta magacaabay Guddiga Qaran ee Taakuleynta Dagaalka lagula jira kooxaha Al-shabaab iyo Daacish.
Xubnaha Guddiga Taakulaynta Dagaalka ee uu magacaabay Raysal wasaaraha oo ka kooban 7 xubnood ayaa waxaa gudoomiye looga dhigay Raysal Wasaare ku xigeenka labaad ee Xukuumadda Fedaraalka Soomaaliya Cabdisalaan Cabdi Cali.
Xubnaha guddiga oo dhamaantood ah masuuliyiin ka tirsan dowladda Fedaraalka ayaa waxaa ka mid ah Wasiirka Arrimaha Gudaha Soomaaliya Cali Yuusuf Cali Xoosh, Wasiirka Caafimaadka Cali Xaaji Xasan, Wasiirka Deegaanka Bashiir Maxamed Jaamac Bashiir Goobe, Wasiiru dowlaha amniga gudaha Maxamed Cali Xagaa, guddoomiyaha gobolka Banaadir Maxamed Axmed Amiir iyo guddoomiyaha hay’adda SoDMA maxamuud Macalin Cabdulle.
Guddigaan ayaa ka shaqeyn doona sidii loo garab istaagi lahaa ciidamada xoogga dalka iyo kuwa Daraawiishta Puntland ee dagaalka adag kula jira mudooyinkii lasoo dhaafay Al-shabaab iyo Daacish.
Raysal wasaare ku xigeenka labaad ee Xukuumaadda Soomaaliya Cabdisalaan Cabdi Cali ayaa sheegay inuu soo dhaweeynaayo magacaabista gudigaan Taakuleynta dagaalka ee guddoomiyaha looga dhigay.
“Waxaan si diiran u soo dhoweynayaa, una mahadcelinayaa Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, oo ii magacaabay hoggaaminta Guddiga Qaran ee Taakuleynta Dagaalka lagula jira kooxaha Khawaarijta ah ee Shabaab iyo Daacish. Tani waa masuuliyad weyn oo aan ku faraxsanahay inaan ka qeyb qaato, waxaana u heellanahay in aan si buuxda u taageero howlgalada xukuumadda ee ka dhan ah kooxaha argagixisada” ayuu yiri Raysal wasaare ku xigeenka labaad Cabdisalaan Cabdi Cali.
Ugu dambeyntii magacaabista guddigaan ayaa kusoo aadeysa, iyadoo qeybo badan oo ka mid ah gobolada dalka ay ka socdaan dagaalo iyo duqeymo culus oo ka dhan ah kooxaha Al-shabaab iyo Daacish, islamarkaana laga xureeyay kooxahaasi dhul baaxad leh oo ay mudo dheer soo maamuli jireen.
