Warar soo baxayay ayaa sheegaya in Ra’isul Wasaaraha Xukuumadda Federaalka Soomaaliya Mudane Xamse Cabdi Barre, maalmaha soo socda qorsheenayo in uu safar ku tago magaalada Laascaanood ee xarunta maamulka SSC Khaatumo .
Maamulka Somaliland, ayaana uga digay Ra’isul Wasaare Xamse Barre in uu tago magaalada Laascaanood oo ay wali aaminsan yihiin in maamulkooda ka taliyo, waxa ay sidoo kale uga digeen Ra’isul Wasaare Xamse Barre in mar kale dagaal halkaasi ka qarxiyo.
Guddoomiyaha gobolka Sool ee Somaliland, Mudane Axmed Faarax Cismaan, ayaa Ra’isul Wasarae Xamse uga digay in uu cagtiisa soo dhigo magaalada Laascaanood, waxa uuna sheegay Xamse Barre haddii uusan ka joogin imaanshihiisa Laascaanood in uu ka qoomameyn doono.
Waxa uu sheegay guddoomiyaha gobolka Sool ee maamulka Somaliland in Ra’isul Wasaare Xamse Laascaanood usoo wado mashruuc la doonayo in mar kale dagaal looga qarxiyo gobolada Sool iyo Sanaag , uuna abuuro colaad horleh.
Guddoomiyaha gobolka Sool ee Somaliland, ayaa sidoo kale sheegay in Madaxweyne Xasan Sheekh iyo Ra’isul Wasaare Xamse Barre yihiin kuwii markii hore abuuray dagaalkii dhiigga badan ku daatay ee ka dhacay magaalada Laascaanood iyo deegaanno kale.
Booqashada lagu wado in Ra’iul Wasaare Xamse Barre ku tago magaalada Laascaanood, ayaa laga cabsi qabaa in uu abuuro khilaaf siyaasadeed oo cusub, waxaa sidoo kale booqashadaasi kasoo horjeeda maamulka Puntland oo khilaaf kala dhaxeeyo dowladda Federaalka.