Heemaal News Network

Soojeedinta Dhex-dhexaadiyayaasha Xabbad-joojinta Qasa Oo ay Ansixisay Xamaas Oo lasoo Bandhigay.

Al Jazeera, ayaa soo bandhigtay nugul ka mid ah soo jeedin ay soo gudbiyeen 27 bishii Maarso, dhex dhexaadiyayaasha xabbad-joojinta Qasa oo la sheegay inay ansixisay Xamaas.

Soo jeedinta dhexdhexaadiyeyaasha ayaa soo jeedisay in Xamaas ay ku sii deyso 5 askari oo lagu beddelanayo xabbad joojin 50 maalmood ah, oo uu ku jiro askarta la sii deynayo Idan Alexander oo ah Israa’iili -Mareykan ah, muddadaa sidoo kale waxaa la sii deynayaa 250 maxaabiis falastiiniyiin ah, oo ay ku jiraan 150 maxbuus oo lagu xukumay xabsi daa’in iyo laba kun oo maxaabiis ah ka soo jeeda Qasa oo la xiray muddadii uu socday dagaalka.

Soo jeedinta dhexdhexaadiyeyaasha ayaa sidoo kale ballan qaaday in la furo isgoysyada, lana hirgeliyo nidaamka bani’aadamnimada. Waxa kale oo uu dhigayaa in Xamaas iyo Israa’iil ay tafaasiil ka bixin doonaan maalinta tobnaad xaaladda maxaabiista, nool iyo kuwa dhintay.

Dhexdhexaadiyayaashu waxay ballan qaadeen inay bilaabayaan wada xaajood degdeg ah muddo 50 maalmood gudahood ah oo ku saabsan xabbad-joojin joogto ah, ka bixitaan dhammaystiran ee ciidanka Israa’iil ee Qasa iyo qabanqaabada maalinta xigta. Markii soo jeedinta ay ansixisay Xamaas, waxaa loo diray Israa’iil, laakin jawaabta Israa’iil waxaa ka mid ahaa diidmo iyo isbeddel lagu sameeyay inta badan qodobbadii soo jeedinta dhexdhexaadiyeyaasha, waxayna Telaabiib ka codsatay Xamaas in ay sii deyso askariga Mareykanka ah Alexander si ay u muujiso niyad wanaag iyada oo aysan waxba ku beddelan ka hor inta uusan dhaqangelin heshiiska. Waxay kaloo codsatay in la sii daayo maalintii ugu horreysa ee heshiiska 10 askari oo lagu beddelo 120 xabsi daa’im ah iyo 1,111 maxbuus oo reer Qasa ah, intaa oo ay dheertahay inay Xamaas sidoo kale wareejiso maalinta tobannaad ee heshiiska 16 meyd oo

israa’iiliyiin ay ku beddelanayso 160 maxbuus oo Falastiiniyiin ah.

Israa’iil waxay ku dartay qodobbada hub ka dhigista iska caabinta iyo diidmada in ay la baxdo ciidamadeeda marinka Qasa si ay u noqoto xadka gorgortanka. Waxay kaloo jawaabteeda ku qeexday in la sameeyo hannaan dammaanad qaadaya gaarsiinta gargaarka rayidka oo keliya.

Markii ay jawaab celinta Israa’iil ay noqotay mid ay shuruudo ka baxaan; Xamaas waxay diidday inay hubka dhigto oo ay u hoggaansanaato heshiis aan waxtar u lahayn marinka Qasa, taa oo ugu dambeyn keentay inuu burburo iskudayga heshiis cusub, iyadoo tan iyo markii Israa’iil ay dib u bilowday dagaalkii xasuuqa ahaa ee Qasa 18-kii March,2025 — ay ku dhinteen 1,042 falastiiniyiin ah, halka 2,542 kalana ay ku dhaawacmeen, kuwaas oo u badan carruur iyo haween.