War ka soo baxay Wasaaradda Arrimaha Dibadda ee Taiwan ayaa lagu xaqiijiyey in Dowladda Federaalka Soomaaliya ay dalkeeda ka mamnuucday iney booqdaan muwaadiniinta Taiwan.
Qoraalka ayaa tilmaamay in go’aankan uu ka dambeeyo cadaadis uga yimid Shiinaha, oo si adag uga soo horjeeda xiriir kasta oo lala yeesho Taiwan.
Tani waxay imaneysa xilli Taiwan ay xiriir sii xoogeysanaya la yeelatay Somaliland — oo ay ka siman yihiin in aan si rasmi ah loo aqoonsan.
Soomaaliya ayaa tallaabadan ku muujisay taageerada ay u hayso midnimada dhuleed ee Shiinaha, taasoo qeyb ka ah siyaasadda “Hal Shine” oo ay dowladu horay u sheegtay in ay aaminsan tahay.
Inta badan majiraan muwaadiniin Reer Taiwan ah oo Muqdisho imaan jiray balse talaabadaan ayay u badantahay in ay saamayso saraakiisha Taiwan ee sida joogta ah Hargaysa u tagi jiray. Dhawaan wasiirka arrimaha dibada Taiwan ayaa sheegay in uu booqan doono Somaliland gaar ahaan maalmaha 18 may.
Wasaaradda Arrimaha Dibadda ee Taiwan ayaa si adag u cambaareysay go’aankaas iyadoo ku baaqday in dowladda Soomaaliya ay dib uga noqoto go’aankeeda.
Taiwan iyo Somaliland ayaa si wadajir ah ugu baaqay dalalka iyo hay’adaha caalamiga ah ee la aragtida ah, in ay cadaadis ku saaraan Soomaaliya si loo laalo xayiraadda.
Taiwan waxay uga digtay muwaadiniinteeda inay u safraan Soomaaliya iyo Somaliland labadaba.
Xayiraaddan safarka ma aha oo keliya arrin sharciyeed, balse waa tallaabo istiraatiiji ah oo muujinaysa awoodda dowladda federaalka. Waxay tusaale u tahay awoodda sii kordheysa ee Soomaaliya ay u leedahay saameynta siyaasadda gobolka iyo tan caalamiga ah, Dhinaca kalena caddayn u ah go’doonka weli haysta Somaliland oo dedaal ugu jirta iney hesho aqoonsi caalami ah.