Taliska Ciidamada Mareykanka ee Afrika (AFRICOM) ayaa wajahaya cadaadis siyaasadeed, iyadoo maamulka Trump uu doonayo in uu meesha ka saaro howlgalka ama lagu daro European Command. General Michael Langley, taliyaha ciidanka Africom ayaa 3-da April hortagi doonaa Senate Armed Services Committee si uu u difaaco AFRICOM, maadaama ay jirto cabsi laga qabo saameynta Shiinaha, Ruushka, iyo Iran ee Afrika. Inkastoo Trump uu shaki galiyay faa’iidada howlgalka, madax sare oo Jamhuuri iyo Dimoqraadi ah ayaa ka soo horjeestay burburinta howlgalka.
Trump ayaa shaacin doonaa cunaqabatayno ganacsi oo lagu beegsanayo dalal Africaan ah oo Koonfur Afrika ka midtahay sababo la xiriira xiriirkeeda Shiinaha iyo Ruushka, iyo mowqifkeeda siyaasadeed ee ka dhanka ah Israa’iil. Dalalka kale ee ay cunaqabatayntani saameyn karto waxaa ka mid ah Brazil, India, iyo Midowga Yurub.
Mareykanka wuxuu wadaxaajood kula jiraa dowladda DRC si uu uga helo heshiis amni iyo mid dhaqaale oo la xiriira cobalt oo ah macdan muhiim u ah warshadaha tamarta nadiifka ah. Madaxweynaha DRC Félix Tshisekedi wuxuu 1-da April khadka taleefanka kula hadlay Senatorka Ted Cruz si ay uga wada hadlaan iskaashiga amni iyo ilaalinta kheyraadka dabiiciga ah ee ka baxsan saameynta Shiinaha.
Howlgalkaan ayaa muhiim u ahaa dagaalka ka dhanka ah argagixisada Soomaaliya ku sugan waxa ayna milatariga Soomaaliya iyo ciidanka maxaliga ah ka caawiyaan duqaymaha dhanka ah cirka ah. Howlgalkii ugu dambeeyay waxa ay ka fuliyeen buuraha Calmiskaad gobolka Bari ee Puntland.
Iyadoo Mareykanku dib u qiimeynayo doorkiisa Afrika, arrimaha amniga, ganacsiga, iyo saameynta Shiinaha iyo Ruushka ayaa ah kuwa ugu muhiimsan ee go’aamin doona mustaqbalka xiriirka labada dhinac. Inkasta oo cunaqabatayno cusub lagu soo rogay dalal Afrikaan ah, haddana fursado iskaashi iyo ganacsi ayaa weli jira, gaar ahaan dhinacyada kheyraadka dabiiciga ah, iyo ammaanka.